Ap Leaders : ఫ్యామిలీ టైం... మిగిలిన కొద్ది సొమ్మును కొరుక్కుతింటారనే భయమా? లేదా? టెన్షనా?

ఆంధ్రప్రదేశ్ లో అన్ని పార్టీల నేతలు టిక్కెట్ వచ్చేంత వరకూ ఒక టెన్షన్ పడ్డారు. టిక్కెట్ ఖరారయినా బీఫారం చేతికందే వరకూ టెన్షన్. బీఫారం అందితే నామినేషన్ సక్రమంగా పూర్తవుతుందా? లేదా? అన్న టెన్షన్.. ఆ తర్వాత అయితే.. టిక్కెట్ వచ్చిన తర్వాత పార్టీలో నేతలను మచ్చిక చేసుకోవడం మరింత టెన్షన్ గా మారింది. ప్రధానంగా ఒకే పార్టీలో ఉన్న నేతలు అలకలు, అసంతృప్తులు తీర్చడానికి కొంత సమయాన్ని వెచ్చించాల్సి వచ్చింది. ఇక ప్రచారంలో అంతా టెన్షన్. అగ్రనేతల పర్యటనలకు జనాన్ని సమీకరించడం ఒక టెన్షన్. చేతిలో ఉన్న డబ్బులు అయిపోవడంతో.. మిగిలిన డబ్బులు ఎక్కడి నుంచి తేవాలన్న టెన్షన్ ఇలా.. దాదాపు మూడు నెలల నుంచి లీడర్ల బీపీ మాత్రం హైలెవెల్లోనే ఉందన్నది వాస్తవం. అయితే ఎన్నికలు ముగియడంతో ఇప్పుడు ఆ టెన్షన్ లన్నీ ఒకింత పక్కన పెట్టి సేదదీరాలని వెళతున్న నేతలకు మరో టెన్షన్ పట్టుకుంది.

ఈసారి ఆంధ్రప్రదేశ్ ఎన్నికల ఫలితాల అంచనాలు ఎవరికీ అందడం లేదు. ఎక్కువ నియోజకవర్గాల్లో టగ్ ఆఫ్ వార్ గా ఎన్నిక జరిగింది. గెలిచినా ఓడినా స్వల్ప ఓట్ల మెజారిటీతోనే సాధ్యమని తేలడంతో పాటు ఓటరు నాడి కూడా ఈసారి అందకుండా పోవడంతో నేతలకు నిద్ర పట్టడం లేదు. కోట్లు కుమ్మరించిన నేతలు తమ డబ్బులు ఓటర్లకు చేరాయా? లేదా? అన్న టెన్షన్ ఒకటయితే.. ఓటరు డబ్బులు తీసుకుని ఓటేశారా? లేక ముందుగానే డిసైడ్ అయినట్లు బటన్ నొక్కాడా? అన్న అనుమానం మాత్రం నేతలను వీడటం లేదు. ఇక కౌంటింగ్ రోజు కూడా ఏజెంట్లు కావాలి. నమ్మకమైన, బలమైన ఏజెంట్లు అవసరం. వారిని మచ్చిక చేసుకోవాలి. అందుకోసం మరో పది రోజులు వేచి చూద్దామని భావించిన నేతలు ఇప్పుడు ఎక్కువ మంది టూర్లు ప్లాన్ చేసుకున్నారు. ఫ్యామిలీతో గడిపి వస్తే కొంత టెన్షన్ తీరుతుందని, తర్వాత వచ్చి నియోజకవర్గంలో పనులు చూసుకోవచ్చన్న భావన వారిలో కనపడుతుంది. మొత్తం మీద ఈవీఎంలలో నిక్షిప్తమైన తమ భవితవ్యం ఏమవుతుందోనన్న టెన్షన్ మాత్రం నేతలను వదిలిపెట్టడం లేదు.