Ap Elections : హిస్టరీ క్రియేట్ చేసిన చంద్రబాబు.. ఎప్పుడూ గెలవని నియోజకవర్గాల్లోనూ గెలుపు

చంద్రబాబు అనేక సార్లు పొత్తులు పెట్టుకున్నారు కూటములను ఏర్పాటుచేశారు. అయితే అప్పుడు కూడా ఈ స్థాయిలో విజయాన్ని అందుకోలేదు. అంతటి విజయం వస్తుందని బహుశ తెలుగుదేశం పార్టీ నేతలు కూడా ఊహించి ఉండరు. ప్రభుత్వంపై చాపకిందనీరులా ఇంతటి వ్యతిరేకత ఉందని ఫలితాల తర్వాతనే అర్థమయిందని చెప్పాలి. విశ్లేషకులకు సయితం అర్థం కాకుండా జనం నాడి ఉందని ఈ రిజల్ట్ తేల్చి చెప్పాయి. ఇది పాలకులకు ఒక గుణపాఠం అని చెప్పాలి. ఎందుకంటే సహజంగా ఓటమి పాలయితే తక్కువ మెజారిటీతో ఓటమి పాలు కావడం, తక్కువ ఓట్లతోతృటిలో అధికారాన్నికోల్పోవడాన్ని చూశాం. కానీ ఈ ఎన్నికల్లో గెలిచిన అభ్యర్థులందరికీ దాదాపు వేల మెజారిటీలు. గతంలో ఎన్నడూ రానంత మెజారిటీలు వచ్చాయి.

వాస్తవానికి గ్రామీణ ప్రాంతాల్లో వైసీపీకి పట్టు ఉందని భావించారు. అర్బన్ ప్రాంతాల్లో తొలి నుంచి ప్రభుత్వంపై వ్యతిరేకత కనిపించినా రూరల్ ఏరియాలో అస్సలు కనిపించలేదు. దీంతో రూరల్ లో పట్టు తమకే ఉందన్న అభిప్రాయం దాదాపు అందరిలోనూ ఉంది. అయితే ఈ ఫలితాలతో పటాపంచలయింది. రూరల్ లేదు.. పట్టణం లేదు... అంతా ఏకమైంది... ఒకే మాట.. అందరూ కలసి మాట్లాడుకున్నట్లు ఓటేసినట్లే అనిపిస్తుంది. ఇంత భారీ స్థాయిలో ఓటమిని జగన్ కూడా ఊహించి ఉండడు. చంద్రబాబు మీద నమ్మకం అయి ఉండవచ్చు. లేకుంటే జగన్ పాలన పై విసుగు పుట్టి ఉండవచ్చు. అందరూ కూడబలుక్కుని బటన్ నొక్కినట్లే ఓటింగ్ జరిగిందని ఈ రిజల్ట్ స్పష్టం చేస్తున్నాయని చెప్పక తప్పదు.