IPL 2024 : స్కై.. కోసం ఎదురు చూపులు.. వస్తే ఇక దబిడి దిబిడే

ముంబయి జట్టులో తక్కువ హిట్టర్లు లేకుండా మాత్రం లేరు. రోహిత్ శర్మ, తిలక్ వర్మ, హార్ధిక్ పాండ్యా, టిమ్ డేవిడ్, నమన్ ధీర్ వంటి బ్యాటర్లున్నారు. అలాగే బుమ్రా, పియూష్ చావ్లా వంటి బౌలర్లున్నారు. అయినా ఈ సీజన్ లో అట్టర్ ఫ్లాప్ అయింది ఈ జట్టు. టీం మేనేజ్ మెంట్ సయితం ఆటగాళ్ల పెర్‌ఫార్మెన్స్ పై పెదవి విరుస్తూంది. ఎందుకిలా జరుగుతుందన్న మేధోమధనం జరుపుతుంది. జట్టులో మార్పులు చేస్తున్నా ఫలితం లేదు, చివరకు సొంత మైదానమైన ముంబయిలోనూ ఆ జట్టు గెలవలేకపోవడంతో ఇక ఈ సీజన్ లో అసలు ముంబయి ఇండియన్స్ సెమీ ఫైనల్స్ కు అడుగు పెడుతుందా? అన్న అనుమానాలు కూడా ఫ్యాన్స్ లో కలుగుతున్నాయి.

అయితే ఈ తరుణంలో ముంబయి ఇండియన్స్ జట్టులో సూర్యకుమార్ యాదవ్ త్వరలో చేరుతున్నారని తెలిసింది. క్రికెట్ అకాడమీలో ఫిట్‌నెస్ పరీక్షలో ఒకటి మినహాయించి అన్నింటా నెగ్గి మైదానంలోకి వచ్చేందుకు రెడీ అవుతున్నారంటున్నారు. ఈరోజు ఆ ఒక్క పరీక్ష పూర్తయి అందులోనూ సూర్య ఫిట్ అని తేలితే ముంబయి జట్టులో స్కై చేరినట్లే. ఎన్‌సీఏ అనుమతి కోసం జట్టు ఎదురు చూస్తుందనే చెప్పాలి. అంతా సవ్యంగా జరిగితే ఈ నెల 7వ తేదీన ఢిల్లీ కాపిటల్స్ తో జరిగే మ్యాచ్ లో సూర్యకుమార్ యాదవ్ బ్యాట్ పట్టే ఛాన్స్ ఉంది. సూర్య వస్తే స్కోరు ఇక పరుగులు పెడుతుందనడంలో ఎలాంటి సందేహం లేదు. అలాగే ముంబయి కూడా గాడిన పడే అవకాశాలున్నాయి.