Fact Check: ରାସ୍ତାଉପରେ କଲରାପତରିଆ ବସିଥିବା ଭିଡିଓଟି କର୍ଣ୍ଣାଟକର, ଓଡ଼ିଶା ସହ ନାହିଁ କୌଣସି ସମ୍ପର୍କ
ରାସ୍ତାଉପରେ କଲରାପତରିଆ ବାଘ ବସିଥିବା ଭିଡିଓଟି କର୍ଣ୍ଣାଟକର, ଓଡ଼ିଶା ସହ ନାହିଁ କୌଣସି ସମ୍ପର୍କ
Claim :
ଭଦ୍ରକ ରୁ ବାଲେଶ୍ୱର ରାସ୍ତାରେ ବସିଛି ବାଘFact :
ଭିଡିଓ ଟି ବହୁ ପୁରୁଣା ଏବଂ କର୍ଣ୍ଣାଟକ ରାଜ୍ୟର ଗଡ଼ଗ ଜିଲ୍ଲାର
ସାତକୋଶିଆ ଅଭୟାରଣ୍ୟକୁ ପୁଣି ଥରେ ମହାବଳ ବାଘ ଆଣିବାକୁ ଅଣ୍ଟା ଭିଡ଼ିଛି ବନ ବିଭାଗ । ଏଥିପାଇଁ ଯୁଦ୍ଧକାଳୀନ ଭିତ୍ତିରେ ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ (ଏନଟିସିଏ) ଦେଇଥିବା ସମସ୍ତ ସର୍ତ୍ତକୁ ପୂରଣ କରିବାକୁ ବନ ବିଭାଗ ଲାଗି ପଡିଛି । ଏହାକୁ ନେଇ ବନ୍ୟଜନ୍ତୁ ପ୍ରେମୀ ଯେତିକି ଖୁସି ବ୍ୟକ୍ତ କରିଛନ୍ତି, ତାଠାରୁ ଅଧିକ ପ୍ରତିକ୍ରିୟାଶୀଳ ହୋଇ ପଡିଛନ୍ତି ସାତକୋଶିଆବାସୀ । ବ୍ୟାଘ୍ର ସଂରକ୍ଷଣ ପ୍ରକଳ୍ପ ଯୋଗୁଁ ଅନ୍ୟତ୍ର ସ୍ଥାନାନ୍ତର ହେବାକୁ ରୋକଠୋକ ମନା କରି ଦେଇଛନ୍ତି ସାତକୋଶିଆର ସ୍ଥାନୀୟ ବାସିନ୍ଦା । ତେଣୁ ଗୋଟିଏ ପଟେ ବ୍ୟାଘ୍ର ସୁରକ୍ଷା ଓ ବଂଶବୃଦ୍ଧି ପାଇଁ ଉଦ୍ୟମ, ଅନ୍ୟପଟେ ସ୍ଥାନୀୟ ବାସିନ୍ଦାଙ୍କ ଜୀବନ-ଜୀବିକାର ସୁରକ୍ଷା ପାଇଁ ଲଢେଇ ମଧ୍ୟରେ ଦୋଛକିରେ ଏବେ ସାତକୋଶିଆ ବ୍ୟାଘ୍ର ପ୍ରକଳ୍ପ ।
ଇତିମଧ୍ୟରେ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭିଡିଓରେ ଏକ କଲରାପତରିଆ ବାଘ ରାସ୍ତା ଉପରେ ସୋଇଥିବାର ଦେଖାଯାଉଛି, ଭିଡିଓ ଟି ରାତ୍ରି ସମୟରେ ରେକର୍ଡ ହୋଇଥିବା ମଧ୍ୟ ଜଣାଯାଉଛି ।
ତେବେ ସୋସିଆଲ ମିଡିଆରେ ୟୁଜର୍ସ ଏହାକୁ "ଭଦ୍ରକ ରୁ ବାଲେଶ୍ୱର ରାସ୍ତାରେ ବସିଛି ବାଘ" ଲେଖି ସେୟାର କରିବାରେ ଲାଗିଛନ୍ତି ।
ସତ୍ୟାସତ୍ୟ:
ଭିଡିଓ ଟି ବହୁ ପୁରୁଣା ଏବଂ କର୍ଣ୍ଣାଟକ ରାଜ୍ୟର ଗଡ଼ଗ ଜିଲ୍ଲାର
ଗୁଗୁଲ ରିଭର୍ସ ଇମେଜ ସର୍ଚ୍ଚରେ ଅନୁସନ୍ଧାନ କରିବାରୁ ଉକ୍ତ ଭିଡିଓଟି ଏକ ୟୁଟ୍ୟୁବ ଚ୍ୟାନେଲରେ ୧୯ ଅପ୍ରେଲ ୨୦୨୩ରେ ଅପଲୋଡ ହୋଇଥିବାର ଦେଖାଯାଇଛି । ଉକ୍ତ ଭିଡିଓ ଟିକୁ ବର୍ତ୍ତମାନ ସୁଦ୍ଧା ୭.୭ ହଜାର ଦର୍ଶକ ଦେଖି ସାରିଥିବା ବେଳେ ୧୦୮ ଟି ଲାଇକ ମଧ୍ୟ ପାଇଛି । ଭାଇରାଲ ଭିଡିଓ ଗୁଡିକ ଅନ୍ୟୁନ୍ୟ ୩୦ ସେକେଣ୍ଡର ହୋଇଥିବା ବେଳେ ଉକ୍ତ ଭିଡିଓ ଟି ୫୮ ସେକେଣ୍ଡର ଅଟେ । ଅନ୍ୟପଟେ ଉକ୍ତ ଭିଡିଓଟି ବେଙ୍ଗାଲୁରୁ ଅଞ୍ଚଳର ବୋଲି ଭିଡିଓରେ ଦର୍ଶାଯାଇଛି ।
ହେଲେ ଯେତେବେଳେ ଆମେ ଇଂରାଜୀରେ "ବେଙ୍ଗାଲୁରୁରେ କଲରାପତରିଆ ବାଘ" ବୋଲି ଗୁଗୁଲରେ ଅନୁସନ୍ଧାନ କରିଥିଲୁ ଏଭଳି କୌଣସି ଭିଡିଓ ହସ୍ତଗତ ହୋଇଥିବାର ଦେଖିବାକୁ ପାଇନଥିଲୁ ।
ଅନ୍ୟପଟେ ଭିଡିଓର ଶେଷ ଅଂଶରେ ଏକ ସବୁଜ ରଙ୍ଗର ବସ୍ ଛିଡାହୋଇଥିବାର ଦେଖାଯାଏ । ବସ୍ ର ନମ୍ବରପ୍ଲେଟକୁ ନିରିଖେଇ ଦେଖିବାରୁ ଏହା KA ରୁ ଆରମ୍ଭ ବୋଲି ଜଣାପଡିଛି, ଯାହାକି କର୍ଣ୍ଣାଟକ ରାଜ୍ୟକୁ ଦର୍ଶାଉଛି ।
ତେଣୁ ଏଥିରୁ ଅନୁମାନ କରାଯାଏ ଯେ, ଘଟଣା ଟି କର୍ଣ୍ଣାଟକ ରାଜ୍ୟର ହୋଇଥାଇପାରେ ।
ଯେତେବେଳେ ଆମେ ଇଂରାଜୀରେ "କର୍ଣ୍ଣାଟକରେ କଲରାପତରିଆ ବାଘ" ଲେଖି ଗୁଗୁଲରେ ଅନୁସନ୍ଧାନ କରିଥିଲୁ, କିଛି ଗଣମାଧ୍ୟମ ଏନେଇ ଖବର ପ୍ରସାରଣ କରିଥିଵାର ଦେଖିବାକୁ ପାଇଥିଲୁ ।
୧୯ ଅପ୍ରେଲ ୨୦୨୩ରେ Indian Express ଏକ ଖବର ପ୍ରସାରଣ କରି ଉଲ୍ଲେଖ କରିଛି, ଉକ୍ତ ଭିଡିଓଟି କର୍ଣ୍ଣାଟକ ଅଞ୍ଚଳର ବୋଲି ଗଡ଼ଗ ବନଖଣ୍ଡ ଅଧିକାରୀ ଦୀପିକା ବାଜପାୟୀ ସୂଚନା ଦେଇଛନ୍ତି । ବାଘଟି ନିକଟସ୍ଥ ଜଙ୍ଗଲରୁ ଆସିଥାଇପରେ ବୋଲି ଜଣାଯାଇଛି । ବାଘଟି ହୁଏତ ଆହତ ହୋଇଥାଇପାରେ ତେଣୁ ଆମ ଟିମ୍ ଏହାକୁ ଅଧିକ ତଦନ୍ତ କରୁଛି ବୋଲି, ଦୀପିକା ସୂଚନା ଦେଇଛନ୍ତି । ସୂଚନା ଥାଉକି ବାଘଟି ଗଡଗ ପ୍ରାଣୀ ଉଦ୍ୟନରୁ ବାହାରି ପଳାଇ ଆସିଛି ବୋଲି ସ୍ଥାନୀୟ ଅଞ୍ଚଳରେ କୋକୁଆ ଭୟ ଦେଖା ଯିବାରୁ, ଏହି ଖବର ପ୍ରସାରିତ କରିଥିଲା Indian Express .
ନିୟୁଜଫାଷ୍ଟ କନ୍ନଡ଼ ନିଜ ୟୁଟ୍ୟୁବ ଚ୍ୟାନେଲରେ ଉକ୍ତ ଭିଡିଓକୁ ସେୟାର କରି ଉଲ୍ଲେଖ କରିଛି, ଗଡ଼ଗ ଜାତୀୟ ରାଜପଥ ଉପରେ ବସିଛି ବାଘ ।
୧୭ ଅପ୍ରେଲ ୨୦୨୩ରେ ଟାଇମ୍ସନାଓ ଖବର ପ୍ରସାରଣ କରି ଉଲ୍ଲେଖ କରିଛି, "କର୍ଣ୍ଣାଟକରର ବିଙ୍କଡାକାଟି ରୋଡ଼ ଦେଇ ଯାଇଥିବା ୬୭ ନମ୍ବର ଜାତୀୟ ରାଜପଥରେ ବାଇକ୍ ଆରୋହୀମାନେ ରବିବାର ରାତିରେ ଏକ ଚିତାବାଘ ଦେଖିବା ପରେ ଆତଙ୍କିତ ହୋଇ ପଡ଼ିଥିଲେ । ଉକ୍ତ ଘଟଣାପରେ ଏହି ଅଞ୍ଚଳର ବାସିନ୍ଦା ଆତଙ୍କିତ ହୋଇପଡିଛନ୍ତି । ଅନ୍ୟପଟେ ସ୍ଥାନୀୟ ବନ ବିଭାଗ ଆସୁଣ୍ଡି, ବିଙ୍କାଡାକାଟୀ ଏବଂ ଶିକ୍ଷକ କଲୋନୀର ବାସିନ୍ଦାଙ୍କୁ ସୂର୍ୟ୍ଯାସ୍ତ ପରେ ବାହାରକୁ ନ ଯିବାକୁ ତଥା ସଜାଗ ରହିବାକୁ ସୂଚନା ଦେଇଛି ।
ସୂଚନା ଥାଉକି, ପୂର୍ବରୁ ଏହି ଭିଡିଓଟି ଆନ୍ଧ୍ରପ୍ରଦେଶର ବୋଲି ଦାବି କରାଯାଇ ସୋସିଆଲ ମିଡିଆରେ ଭାଇରାଲ କରାଯାଇଥିଲା । 'ତେଲୁଗୁପୋଷ୍ଟ' ଏହାକୁ ଫ୍ୟାକ୍ଟ ଚେକ୍ କରି ଏହା କର୍ଣ୍ଣାଟକ ରାଜ୍ୟ ଗଡ଼ଗ ଜିଲ୍ଲାର ବୋଲି ସୂଚନା ଦେଇଥିଲା ।
ତେଣୁ ଏଥିରୁ ପ୍ରମାଣିତ ହେଲାଯେ ଭାଇରାଲ ଭିଡିଓ ଟି ବହୁ ପୁରୁଣା ଏବଂ ଓଡ଼ିଶା ସହ କୌଣସି ସମ୍ପର୍କ ନାହିଁ । ଉକ୍ତ ଭିଡିଓଟି କର୍ଣ୍ଣାଟକ ରାଜ୍ୟର ଗଡ଼ଗ ଜିଲ୍ଲାର I
