Andhra Pradesh : ఆల్ గుడ్ ఫీల్ తో అధికారుల బురిడీ... అసలు వాస్తవ పరిస్థితి ఏంటంటే?

పత్తి, వంగ, టమాటా, కంది, మిరపా ఇలా అన్ని పంటలు రైతులు తమ ఉత్పత్తులను మార్కెట్ కు తీసుకు వచ్చి నష్టపోతున్నారు. ఎందుకంటే మార్కెట్ యార్డులో దళారుల ప్రమేయం మాత్రం బాగా ఉంటుంది. అదే సమయంలో వ్యాపారులు కూడా కావాలని ధరలు తగ్గించి కొనుగోలు చేస్తున్నారు. అధికారులు మాత్రం భలే ధర వచ్చిదంటూ జబ్బలు చరుచుకునేలా నివేదికలు సమర్పిస్తున్నారు. రైతుల పరిస్థితిని తెలియజేసే అధికారులు ఇచ్చే నివేదికల్లో వాస్తవం పాళ్లు తక్కువగా ఉండటంతో దానిపై ప్రభుత్వం కూడా చర్యలకు దిగడం లేదు. ఈరోజు మిర్చి రైతులతో చంద్రబాబు నేరుగా సమావేశం అవుతున్నారు కాబట్టి గుంటూరు మిర్చి యార్డులో జరుగుతున్న వాస్తవ పరిస్థితి తెలియనుంది.

మిర్చికి క్వింటా రకాన్ని బట్టి తొమ్మిది నుంచి పదకొండు వేల రూపాయల లోపే కొనుగోలు చేస్తున్నారు. కానీ అధికారులు మాత్రం చంద్రబాబు నాయుడుకు పన్నెండు వేల నుంచి పథ్నాలుగు వేలు కొనుగోలు అమ్మడవుతున్నట్లు లెక్కలు చెబుతున్నారు. సన్న మిర్చి ఇరవై క్వింటాళ్ల దిగుబడి వచ్చినా కేవలం రెండు లక్షలే వస్తుంది. కానీ ఎకరానికి పెట్టుబడి రెండు లక్షల డెబ్భయి అయిదు వేల రూపాయలు అవుతుంది. దాదాపు ఎకరానికి ఈ లెక్కన 75 వేల రూపాయల నష్టాన్ని చవి చూడాల్సి వస్తుంది. మిర్చి రైతులు ఎందుకు అంతగా అందోళన చేస్తున్నారన్నవిషయాన్ని చంద్రబాబు దృష్టికి తీసుకెళ్లకుండా అధికారులు జాగ్రత్తలు పడ్డారు. ఈరోజు నేరుగా రైతులతో సమావేశంలో వాస్తవ పరిస్థితులు వెల్లడయి తగిన నిర్ణయం తీసుకుంటే మిర్చి రైతుకు కొంతైనా గిట్టుబాటు ధర కల్పించేలా ప్రభుత్వం చర్యలు తీసుకునే అవకాశముంది.