Chandrababu : రైతుల ఖాతాల్లో నగదు ఎప్పుడు వేయాలంటే? డేట్ ఫిక్స్ చేసిన చంద్రబాబు

దీనికి అన్నదాత సుఖీభవ పథకం అని ఎన్నికలకు ముందే నామకరణం చేశారు. అయితే చంద్రబాబు తాము అధికారంలోకి వస్తే ఇరవై వేలు ఇస్తామని చెప్పారని, కేంద్ర ప్రభుత్వ నిధులతో కలిపి ఇస్తే ఎలా? అని విపక్షాలు వేస్తున్న ప్రశ్నలకు కూడా ధీటుగా సమాధానం చెప్పాలని చంద్రబాబు సూచించినట్లు తెలిసింది. కూటమి ప్రభుత్వం అంటే కలసి పోటీ చేశామని, తమ హామీలు కూడా కలిసి నెరవేరుస్తామని చెప్పాలని, అందులో భాగంగానే అన్నదాత సుఖీభవ పథకాన్ని కేంద్ర ప్రభుత్వం ఎప్పుడు పది వేలు ఇస్తే అప్పుడు వెంటనే రైతుల ఖాతాల్లో రాష్ట్ర ప్రభుత్వం నుంచి కూడా పదివేలు జత చేసి వేయాలని అధికారులను ఆదేశించినట్లు తెలిసింది. దీనికి సంబంధించి విధివిధానాలు నిర్ణయం కాకపోయినా పీఎం కిసాన్ సమ్మాన్ కింద అర్హులైన వారికే ఇవ్వాలని ప్రాధమికంగా నిర్ణయించినట్లు తెలుస్తోంది.

ఇక ఎన్నికల సమయంలో ఇచ్చిన హామీల్లో భాగంగా ఇప్పటికే ఫించన్ పెంపు, దీపం పథకాలను, మెగా డీఎస్సీ ప్రకటన, అన్న కాంటీన్ల పునరుద్దరణ వంటి వాటిని అమలు చేశారు. అలాగే మరికొన్ని హామీలను కూడా అమలు చేసే దిశగా చంద్రబాబు ప్రయత్నిస్తున్నారు. ఖజానాలో డబ్బులు లేకపోయినా అప్పులు తెచ్చి అయినా పథకాలు అమలు చేయాలన్న నిర్ణయానికి వచ్చారు. వచ్చే విద్యాసంవత్సరంలోపు తల్లికి వందనం అమలు చేయాలని కూడా నిర్ణయించారు. పాఠశాలల పునప్రారంభంలోపు మెగా డీఎస్సీ అమలు చేయాలని స్పష్టం చేశారు. విద్యాసంస్థల యాజమాన్యాలతో మాట్లాడి కొత్త విద్యాసంవత్సరం ఫీజ్ రీఎంబర్స్‌మెంట్ చెల్లింపులు చేయాలని కూడా చంద్రబాబు నిర్ణయించారు. అంటే ఇక రానున్న కాలంలో వరసగా ఒక్కొక్క హామీని అమలు చేసేందుకు అవసరమైన నిధుల సేకరణ బాధ్యతను చంద్రబాబు అధికారులపై ఉంచారు.