Nallari : నల్లారి మళ్లీ కనిపించడం లేదే...దారి మార్చుకోలేకపోతున్నారా?

భారతీయ జనతా పార్టీ అభ్యర్థిగా రాజంపేట నుంచి పోటీ చేసిన నల్లారి కిరణ్ కుమార్ రెడ్డి మొన్నటి ఎన్నికల్లో ఓటమి పాలయ్యారు.. రాష్ట్రమంతటా కూటమి అభ్యర్థులు ఇరవై ఒక్కస్థానాలలో గెలిస్తే నాలుగు స్థానాల్లో మాత్రమే ఓటమి పాలయింది. కడప, తిరుపతి, అరకుతో పాటు రాజంపేట పార్లమెంటు స్థానం. రాజంపేటలో తాను గెలిస్తే కనీసం ఢిల్లీ స్థాయిలో ఐదేళ్లు సేదతీరాలనుకున్నారు. మాజీ ముఖ్యమంత్రి కాబట్టి కేంద్ర మంత్రి పదవి కూడా దక్కే అవకాశం ఉందని లెక్కలేసుకున్నారు. కానీ ఊహించని ఓటమితో ఆయన డల్ అయ్యారు. తాను ఊహించుకున్న కలలన్నీ పేకమేడల్లా కూలికపోవడంతో తిరిగి పదేళ్లు వెనక్కు వెళ్లిపోయారు.

రాజంపేటలో తన ప్రత్యర్థి పెద్దిరెడ్డి కుటుంబం చేతిలోనే ఆయన ఓటమి పాలు కావడాన్ని తట్టుకోలేకపోయారు. అందుకే ఆయన తిరిగి హైదరాబాద్ కు పరిమితమయ్యారు. ఆంధ్రప్రదేశ్ లో కూటమి అధికారంలోకి వచ్చింది. కేంద్రంలోనూ తాను ప్రాతినిధ్యం వహించిన పార్టీ కూడా పవర్ లోనే ఉంది. ఆయన నియోజకవర్గం ప్రజలకు దగ్గరయి వచ్చే ఎన్నికలకు సిద్ధం కావాల్సిన సమయంలో నల్లారి కిరణ్ కుమార్ రెడ్డి వ్యవహారం మళ్లీ మొదటి కొచ్చిందన్న కామెంట్స్ పార్టీ నుంచే వినిపిస్తున్నాయి. బీజేపీలో పార్టీకి ఉపయోగపడే వారికే ప్రాధాన్యత ఉంటుంది. అంతేకానీ పిలిచి బొట్టుపెట్టి మరీ పెద్దపీట వేస్తారని భావించడం కమలం పార్టీలో అత్యాశ కిందే మారుతుంది.

ఎందుకంటే.. గత ఎన్నికల్లో ఇచ్చిన సీట్లు కానీ, కేంద్రంలో, రాష్ట్రంలో ఇచ్చిన మంత్రి పదవులను బట్టి చూస్తే విధేయత, విశ్వసనీయత ఉన్నవారికే పదవులు దక్కుతాయి. కానీ ఎందుకో మళ్లీ నల్లారిలో ఈ నిరాశ ఎందుకు మొదలయిందని ఆయన సన్నిహిత వర్గాల్లో పెద్దయెత్తున చర్చ జరుగుతుంది. ఆయన యాక్టివ్ గా ఉంటే తమకు కూడా లోకల్ గా ఏదో నామినేటెడ్ పదవులు వస్తాయని, ఆయనే పార్టీకి దూరంగా ఉండి పట్టీపట్టనట్లు ఉంటే తమ పరిస్థితి ఏంటన్న ప్రశ్న నల్లారి అనుచరుల్లో మొదయింది. ఓడిపోయామని హైదరాబాద్ కు వెళ్లినంత మాత్రాన రాజకీయ అవసరాలు ఎలా తీరతాయని కొందరు అనుచరులు నేరుగానే ప్రశ్నిస్తున్నారు. మొత్తం మీద నల్లారి కిరణ్ కుమార్ రెడ్డి వ్యవహారం కమలంపార్టీలోనే కాదు.. ఆయన అనుచరుల్లోనూ హాట్ డిస్కషన్ గా మారింది.