Mohan Babu : తండ్రీకొడుకుల.. యుద్ధం గడప దాటిందిగా... ?

మనోజ్ తన ఏడు నెలల కుమార్తెను తన ఇంటి పనిమనిషి చూసుకుంటుందని తెలిపారు. అంతేకాకుండా మాదాపూర్ లోని తన కార్యాలయంలో 30 మంది వ్యక్తులతో కలసి వచ్చి తనను బెదిరించారని కూడా తెలిపారు. మనోజ్, మౌనిక తన ఇంటిని అక్రమంగా ఆక్రమించుకుని తన ఉద్యోగులను సయితం బెదిరిస్తున్నారని తెలిపారు. తన ఆస్తుల విషయంలో భయపడుతున్నానని, 78 ఏళ్ల వయసున్న సీనియర్ సిటిజన్ ను తాను అని, తన ఇంటిని స్వాధీనం చేసుకోవడానికి వారు ప్రయత్నించారని ఆరోపించారు. వారిపై చట్టపరమైన చర్యలు తీసుకోవాలని కోరారు. తన భద్రత కోసం అదనపు సిబ్బందిని కూడా కేటాయించాలని కోరారు. తనకు మనోజ్, మౌనికల నుంచి రక్షణ కల్పించాలంటూ మోహన్ బాబు రాచకొండ కమిషనర్ ను కోరారు.

మరోవైపు మంచు మనోజ్ కూడా పహాడీషరీఫ్ పలీసులకు ఫిర్యాదు చేశారు. కొందరు వ్యక్తులు తన భార్య మౌనికపై దాడి చేశారని, తనకు, తన భార్యకు ప్రాణహాని ఉందని పేర్కొన్నారు. దీంతో పాటు మంచు మనోజ్ ఎక్స్ వేదికగా చేసిన పోస్టు కూడా మోహన్ బాబు ఇంట్లో విభేదాలు ఏ స్థాయిలో ఉన్నాయో అర్థమవుతుంది. తన భార్య, తనపై మోహన్ బాబు చేసిన దురుద్దేశపూరితమైన, తప్పుడు, నిరాధార ఆరోపణలను ప్రస్తావిస్తున్నందుకు బాధగా ఉందన్నారు. తన తండ్రి మోహన్ బాబు లేవనెత్తే అంశాలుతప్పు మాత్రమే కాకుండా, తన పరువు, మర్యాదలకు భంగం కలిగించేలా ఉన్నాయని చెప్పారు. తన గొంతు వినిపించకుండా కుటుంబంలో అనవసర కలహాలు లేవనెత్తడానికే ఈ ప్రయత్నం చేస్తున్నారని మంచు మనోజ్ ఆరోపించారు.

తను ఎవరిపై ఆధారపడి బతకడం లేదని, గౌరవంగా సమాజంలో బతుకుతున్నప్పటికీ, ఆర్థిక సాయం కోసం వారిపై తాను ఎన్నడూ ఆధారపడకపోయినప్పటికీ అనవసర ఆరోపణలు చేస్తున్నారన్నారర. తాను ఎలాంటి ఆస్తిపాస్తులు అడగలేదని, ఆ ఆలోచన కూడా సరైంది కాదని మనోజ్ అభిప్రాయపడ్డారు. ఈ వివాదంలోకి ఏడు నెలల త నకూతురిని కూడా లాగడం విచారకరమని అన్నారు. పిల్లలను గొడవల్లోకి లాగవద్దని మనోజ్ అభ్యర్థించారు. ఇంట్లో ఉన్న సీసీటీవీ ఫుటేజీలను కూడా మాయం చేశారన్నారు. తాను ఎనిమిదేళ్లుగా విరామం లేకుండా తన తండ్రి, సోదరుడు చిత్రాల కోసం పనిచేశానని, కానీ కొందరి పట్ల పక్షపాత ధోరణితో తన తండ్రి వ్యవహరిస్తున్నాడని మనోజ్ తెలిపారు. తన కుటుంబం పరువు కాపాడుకోవడానికి పెద్దల ముందు చర్చలు జరపాలని చెప్పానని, అయినా తన తండ్రి మోహన్ బాబు పట్టించుకోలేదని మంచు మనోజ్ తెలిపారు.