Hyderabad : గేటెడ్ కమ్యునిటీలకు ఆదరణ కరువు.. వాటికే డిమాండ్ అట

ఇండిపెండెంట్ హౌస్‌లకు ఎక్కువ సొమ్ము పెట్టి వెచ్చించే అవకాశమున్నప్పటికీ వాటి జోలికి పోవడం లేదు. కొంత బెరుకు.. మరికొంత భయం వారిని వెంటాడుతుంది. సీనియర్ సిటిజన్లుగా ఇద్దరు భార్యాభర్తలే ఇండిపెండెంట్ హౌస్‌‌లో ఉండటానికి ఇష‌్టపడటం లేదు. ఇద్దరే ఉన్న దంపతులను టార్గెట్ గా చేసుకుని కొన్ని ముఠాలు నగరంలో చెలరేగిపోతుండటం, బంగారు ఆభరణాలు, డబ్బులు కోసం హత్యల వరకూ తెగబడటం వంటివి చూసి సెక్యూరిటీ పరంగా కొంత అపార్ట్‌మెంట్ వైపు మొగ్గుచూపుతున్నారు. విదేశాల్లో ఉన్న వారు కూడా ఇలాంటి వాటిని కొనుగోలు చేసేందుకు ఇష్టపడుతున్నారు. తక్కువ ఫ్లాట్స్ ఉన్న అపార్ట్‌మెంట్స్ హైదరాబాద్ నగరంలో హాట్ కేకుల్లా అమ్ముడుపోతున్నాయి.

తక్కువ ఫ్లాట్లు ఉంటే తాగు నీటి సమస్య రాదు. డ్రైనేజీ సమస్య తొందరగా తలెత్తదు. దీంతో పాటు ఉన్న పది మంది ఫ్లాట్ వాసులు కలివిడిగా ఉంటారు. ఎవరికి వారే అన్నట్లు అంటీముట్టనట్లు తలుపులు వేసుకుని ఉండరు. ఉదయం, సాయంత్రం వేళలలో పెద్దలతో బాతాఖానీ చెయొచ్చు. మహిళలు కూడా ఒక్కటిగా అన్ని పండగలు చేసుకునే సంప్రదాయం తక్కువ ఫ్లాట్స్ ఉన్న అపార్ట్‌మెంట్లలోనే జరుగుతుంది. కారు పార్కింగ్ సమస్య కూడా పెద్దగా ఉండదు. కారును బయటకు తీయడానికి పెద్దగా కష్టపడాల్సిన పనిలేదు. అదే గేటెట్ కమ్యునిటీలో వందల సంఖ్యలో ఫ్లాట్స్ ఉంటే ఎవరు ఏ ఫ్లాట్ లో ఉన్నారో పక్క వారికి కూడా తెలియదు. బయట నుంచి వచ్చి తలుపు వేసుకున్నారంటే బయటకు రారు. ఆదివారాలు కూడా తలుపులు బిగించుకుని ఇంట్లోనే మగ్గిపోతుంటారు. దీంతో హైదరాబాద్ లో ఐదు చదరపు గజాల్లో నిర్మించిన పది నుంచి పన్నెండు ఫ్లాట్స్ ఉన్న అపార్ట్‌మెంట్లు మాత్రం హాట్ కేకుల్లా అమ్ముడుపోతున్నాయని రియల్ ఎస్టేట్ వ్యాపారులు చెబుతున్నారు. అదే సమయంలో గేటెడ్ కమ్యునిటీ ఫ్లాట్స్ లో కావల్సినన్ని ఖాళీగా దర్శనమిస్తున్నాయి.