ఆ బాధను వారి కుటుంబమంతా అనుభవించాలి : రష్మీ గౌతమ్

మూగ జీవులను జాగ్రత్తగా చూసుకోవడమే కాదు.. వాటికి ఎవరైనా బాధ కలిగించినా, వాటిపై దాడులు జరిగినా రష్మీ వెంటనే స్పందిస్తుంది. ఇన్ స్టా లో ఆయా ఘటనలపై రష్మీ ఘాటుగానే స్పందిస్తుంటుంది. గతంలో హైదరాబాద్‏లో కుక్కలపై మనుషులు వ్యవహరించిన తీరుపట్ల తీవ్ర ఆగ్రహం వ్యక్తం చేసింది రష్మీ. తాజాగా ఓ దారుణ ఘటన మీద రష్మీ మరోసారి ఫైర్ అయ్యింది. బెంగళూరులోని ఓ అపార్ట్ మెంట్లోని యువకుడు తన ఆడి కారును నడుపుతూ.. పడుకుని ఉన్న కుక్క మీదుగా పోనిచ్చాడు. దాంతో ఆ కుక్క చనిపోయింది. ఈ ఘటన సోషల్ మీడియాలో బాగా వైరల్ అయింది.

పోలీసులు సదరు యువకుడిని అదుపులోకి తీసుకుని, అరెస్ట్ చేశారు. అయితే ఆ యువకుడి కుటుంబానికి స్థానికంగా బాగా పలుకుబడి ఉందట. అక్కడి రాజకీయ నాయకులతో సంబంధాలు కూడా ఉన్నాయట. పలుకుబడికి భయపడి పోలీసులు యువకుడిని విడిచిపెడితే ఊరుకోబమని జంతుప్రేమికులు నెట్టింట్లో పోస్టులు చేశారు. ఆ ఘటనపైనే రష్మీ కూడా స్పందించింది. "డబ్బుతో వస్తువులను కొనొచ్చు.. కానీ బుద్దిని, పద్దతిని కొనలేం. కఠినంగా శిక్షించారని తెలిసి సంతోషిస్తున్నాను. ఆ అమాయకపు జీవి పడ్డ బాధను ఆ కుటుంబం అంతా కూడా అనుభవిస్తారని ఆశిస్తున్నాను. కుక్కను రాళ్లతో కొట్టడం అనేది సరదా విషయం అని పిల్లలకు నేర్పించకండి.. వాళ్లే భవిష్యత్తులో ఇలా తయారవుతారు" అని తన ఇన్ స్టా స్టోరీస్ లో రాసుకొచ్చింది.