సినిమా పవిత్రమైన దేవాలయం.. ఎన్టీఆర్, చరణ్ ల వల్లే ఇది సాధ్యం : ఎస్ఎస్ రాజమౌళి

ఎఫ్ సీసీ అవార్డును అందుకున్న రాజమౌళి తొలుత భావోద్వేగానికి గురయ్యారు. ఇంత ప్రతిష్ఠాత్మకమైన వేదికపై నిలబడి మాట్లాడాలంటే.. చాలా కంగారు పుట్టిస్తోందన్నారు. తన దృష్టిలో సినిమా అంటే.. ఒక పవిత్రమైన దేవాలయం వంటిదని రాజమౌళి అభివర్ణించారు. బాల్యంలో థియేటర్ కు వెళ్లి సినిమా చూసిన అనుభూతులు ఇంకా పదిలంగా ఉన్నాయని తెలిపారు. ఏ సినిమాలోనైనా.. ఓ సీన్ షూట్ చేసేముందు అది థియేటర్ లో తెరపై ఎలా ఉంటుంది అని ఊహించుకుని చిత్రాలు చేస్తానని వివరించారు.

ప్రపంచవ్యాప్తంగా ఉన్న భారతీయులను దృష్టిలో ఉంచుకుని తాను సినిమాలు చేస్తాను.. కానీ ఆర్ఆర్ఆర్ చిత్రానికి విదేశీయుల నుండి కూడా ఇంత ఆదరాభిమానాలు లభించడం.. తనను ఆశ్చర్య పరుస్తోందన్నారు. చాలా మంది సినిమా యూనిట్ అంటే కుటుంబం వంటిదని మాటవరుసకు చెప్తుంటారు కానీ.. తనకు మాత్రం నిజంగా కుటుంబమే సినిమా యూనిట్ అని తెలిపారు. తన సినిమాలకు కథలు తండ్రి విజయేంద్రప్రసాద్ రాస్తే.. పెద్దన్న కీరవాణి సంగీతం సమకూర్చుతారని, తన అర్ధాంగి రమ కాస్ట్యూమ్ డిజైనర్ గా, కుమారుడు కార్తికేయ, వదిన వల్లి లైన్ ప్రొడ్యూసర్లుగా వ్యవహరిస్తారని, అన్నయ్య కీరవాణి కుమారుడు కాలభైరవ సింగర్ గా, మరో సోదరుడు శివశ్రీ కాంచీ రచయితగా తన వెంట నిలిచే బృందం అని వివరించారు. తాను ఎలాంటి విజయం సాధించినా, ఏ అవార్డు అందుకున్నా కుటుంబానికి కృతజ్ఞతలు చెప్పుకుంటానని తెలిపారు.