Petrol Prices : గుడ్ న్యూస్... త్వరలో తగ్గనున్న పెట్రోలు ధరలు... ఎంతంటే?

కేంద్ర ప్రభుత్వం ఈ విషయంలో కీలక నిర్ణయం తీసుకునే అవకాశముందంటున్నారు. అంతర్జాతీయ మార్కెట్ లో క్రూడాయిల్ ధరలు తగ్గడం కూడా పెట్రోలు, డీజిల్ ధరలు తగ్గడానికి ఒక కారణంగా చెబుతున్నారు. పెట్రోలు ధరలు తగ్గే అవకాశముందని ఇప్పటికే కేంద్ర పెట్రోల్ సహజ వాయువుల శాఖ సహాయ మంత్రి హర్దీప్ సింగ్ పూరి తెలిపారు. పెట్రోలియం అండ్ సహజ వాయువుల శాఖ కార్యదర్శి పంకజ్ జైన్ కూడా ఇదే విషయాన్ని తెలిపారు. పెట్రోలు ధరలు తగ్గితే నిజంగా శుభపరిణామంగానే చూడాలి. ఎందుకంటే దానితో అనేక వస్తువుల ధరలు కూడా తగ్గుముఖం పడతాయి. సామాన్యులపై ఆర్థిక భారం తగ్గుతుంది.

మొన్నటి వరకూ అంతర్జాతీయ మార్కెట్ లో క్రూడాయిల్ ధరలు ఒక బ్యారెల్ చమురు ధర ఎనభై డాలర్ల కంటే ఎక్కువగా ఉండేది. కానీ ఇప్పుడు ఈ ధర 70 72 డాలర్ల గా ఉంది. ఇదే కొనసాగితే దేశంలో పెట్రోలు ధరలను కేంద్ర ప్రభుత్వం తగ్గించే అవకాశాలున్నాయి. ఇది కేంద్రంలో ఉన్న బీజేపీ ప్రభుత్వానికి రాజకీయ అవసరం కూడా. అతిపెద్దదైన మహారాష్ట్ర ఎన్నికలు దగ్గరపడుతున్న సమయంలో ఈ నిర్ణయం కమలం పార్టీకి అనుకూలంగా మారే అవకాశముంది. అందుకోసమైనా ధరలు తగ్గుతాయని, అందుకే మంత్రి, కార్యదర్శి ఈ హింట్ ఇచ్చారంటున్నాయి హస్తిన వర్గాలు. మరో వైపు అనేక దేశాల్లో ఆర్థిక మాంద్యం కూడా ఇందుకు కారణంగా విశ్లేషకులు అంచనా వేస్తున్నారు. మొత్తం మీద ఏది ఏమైనా భారీగా పెరిగిన పెట్రోలు, డీజిల్ ధరలు కొంతమేరకైనా తగ్గితే అది చాలా ఉపశమనం కలిగిస్తాయనడంలో ఎటువంటి సందేహం లేదు.