Ganta Srinivasa Rao : గంటా కీలక సమావేశం నేడు... నిర్ణయం ఎలా ఉంటుందో?

గంటా శ్రీనివాసరావు గత ఎన్నికల్లో విశాఖపట్నం ఉత్తర నియోజకవర్గం నుంచి పోటీ చేసి విజయం సాధించారు. గంటా ప్రతి ఎన్నికకు నియోజకవర్గాన్ని మార్చడం అలవాటు. అనకాపల్లి ఎంపీగా పోటీ చేసి గెలిచారు. చోడవరం నుంచి ఎమ్మెల్యేగా అయ్యారు. తర్వాత భీమిలీకి తన మకాం మార్చి అక్కడి నుంచి 2014 లో ఎన్నికయ్యారు. చంద్రబాబు మంత్రివర్గంలో స్థానం సంపాదించారు. 2019 ఎన్నికల్లో మరోసారి నియోజకవర్గాన్ని మార్చారు. విశాఖ ఉత్తర నియోజకవర్గం నుంచి పోటీ చేసి స్వల్ప మెజారిటీతో నెగ్గారు.

అయితే ఈసారి గంటా శ్రీనివాసరావును పార్టీ అధినాయకత్వం చీపురుపల్లి నుంచి పోటీ చేయాలని కోరింది. విజయనగరం జిల్లా చీపురుపల్లి నుంచి ప్రస్తుత మంత్రి బొత్స సత్యనారాయణపై పోటీ చేయాలని టీడీపీ అధినాయకత్వం సూచించింది. అయితే ఇందుకు గంటా శ్రీనివాసరావు అంగీకరించడంలేదు. తాను విశాఖ జిల్లాను వదిలి వెళ్లేందుకు సుముఖంగా లేనని అధినాయకత్వంతో చెప్పి వచ్చారు. దీంతో ఆయనకు ఎక్కడ సీటు కేటాయిస్తారన్న దానిపై ఇప్పుడు గంటా అనుచరుల్లో టెన్షన్ మొదలయింది.

టీడీపీ, జనసేన, బీజేపీ పొత్తు ఉండటంతో గంటా శ్రీనివాసరావుకు విశాఖ జిల్లాలో అవకాశం దక్కే ఛాన్స్ ఉండదని భావిస్తున్న సమయంలో ఆయన అడుగులు ఎలా ఉంటాయన్నది ఆసక్తికరంగా మారింది. తనకు టిక్కెట్ తాను ఆశించిన స్థానంలో అదీ విశాఖ జిల్లాలో దక్కకుంటే గంటా శ్రీనివాసరావు సీరియస్ డెసిషన్ తీసుకునే అవకాశముందంటున్నారు. అందుకే రెండో జాబితాలో ఆయనకు పేరు ఉంటుందా? లేదా? అన్న దానిపై సర్వత్రా ఉత్కంఠ నెలకొంది. గంటా శ్రీనివాసరావు మాత్రం ఈరోజే ఆత్మీయులతో సమావేశం పెట్టడం మరో విశేషంగా చెప్పుకోవాలి.