భయపెట్టిన పాకిస్థాన్

ఓపెనర్లు ఇమామ్ ఉల్ హక్ (70), అబ్దుల్లా షఫీక్ (64) తొలి వికెట్ కు 21.1 ఓవర్లలో 134 పరుగులు జోడించి శుభారంభం అందించారు. భారత్ తో మ్యాచ్ లో హాఫ్ సెంచరీ కొట్టిన కెప్టెన్ బాబర్ అజామ్ ఈ మ్యాచ్ లో 18 పరుగులు మాత్రమే చేసి అవుటయ్యాడు. వికెట్ కీపర్ బ్యాట్స్ మన్ మహ్మద్ రిజ్వాన్ 46, షకీల్ 30, ఇఫ్తికార్ 20 బంతుల్లో 3 సిక్సులతో 26 పరుగులు చేసి మ్యాచ్ ను పాక్ వైపు తిప్పినా.. ఆఖర్లో కీలక వికెట్లు కోల్పోయి మ్యాచ్ ను ఆసీస్ కు ఇచ్చేసింది. ఆసీస్ బౌలర్లలో జంపా 4, కమిన్స్ 2, స్టొయినిస్ 2, స్టార్క్ 1, హేజెల్ వుడ్ 1 వికెట్ తీశారు. ఆసీస్ వరుసగా రెండు విజయాలను సాధించి నాలుగో స్థానానికి ఎగబాకింది.

టాస్ ఓడి బ్యాటింగ్ కు దిగిన ఆస్ట్రేలియా నిర్ణీత 50 ఓవర్లలో 9 వికెట్లకు 367 పరుగులు చేసింది. ఆసీస్ ఓపెనర్లు వార్నర్, మిచెల్ మార్ష్ సెంచరీలు బాదడంతో ఆస్ట్రేలియా భారీ స్కోరు చేసింది. వార్నర్ 124 బంతుల్లో 14 ఫోర్లు, 9 సిక్సర్లతో 163 పరుగులు చేశాడు. మార్ష్ 108 బంతుల్లో 10 ఫోర్లు, 9 సిక్సర్లతో 121 పరుగులు సాధించాడు. వార్నర్, మార్ష్ అవుటయ్యాక... మ్యాక్స్ వెల్ (0) డకౌట్ కాగా, స్టీవ్ స్మిత్ (7) నిరాశపరిచాడు. స్టొయినిస్ 21, వికెట్ కీపర్ జోష్ ఇంగ్లిస్ 13, లబుషేన్ 8, కెప్టెన్ కమిన్స్ 6 పరుగులు చేశారు. పాక్ బౌలర్లలో షహీన్ అఫ్రిది 5, హరీస్ రవూఫ్ 3, ఉసామా మిర్ 1 వికెట్ తీశారు.