Shahbaz Nadeem: షాబాజ్ నదీమ్.. షాకింగ్ నిర్ణయం

స్పిన్నర్ షాబాజ్ నదీమ్ అన్ని రకాల అంతర్జాతీయ క్రికెట్‌ల నుంచి రిటైరయ్యాడు. నదీమ్ తన ఫస్ట్‌క్లాస్ కెరీర్‌లో 542 వికెట్లు పడగొట్టాడు. భారత్ తరపున రెండు టెస్టులు ఆడాడు. 30 ఏళ్ల వయసులో 2019లో టెస్టు అరంగేట్రం చేశాడు. కుల్దీప్ యాదవ్ స్థానంలో జార్ఖండ్ స్పిన్నర్‌ని భారతజట్టులోకి తీసుకున్నారు. దక్షిణాఫ్రికాతో రాంచీ టెస్టు సందర్భంగా షాబాజ్ తొలి ఇన్నింగ్స్‌లో 22 పరుగులకు 2 వికెట్లు, రెండో ఇన్నింగ్స్‌లో 18 పరుగులకు 2 వికెట్లు పడగొట్టాడు. రోహిత్ శర్మ డబుల్ సెంచరీ, అజింక్యా రహానే సెంచరీ చేసిన ఆ మ్యాచ్‌ లో భారత్ ఇన్నింగ్స్ మరియు 202 పరుగులతో గెలిచింది. నదీమ్ రెండవ టెస్ట్ మ్యాచ్ ఆడటానికి అతనికి మరో రెండు సంవత్సరాలు పట్టింది. 2021లో ఇంగ్లండ్‌తో జరిగిన టెస్టు మ్యాచ్‌లో షాబాజ్ నదీమ్ 44 ఓవర్లు బౌలింగ్ చేసి తొలి ఇన్నింగ్స్‌లో 167 పరుగులకు 2 వికెట్లు పడగొట్టాడు. రెండో ఇన్నింగ్స్ లో 66 పరుగులకు 2 వికెట్లు తీశాడు.

"నేను చాలా కాలంగా ఈ నిర్ణయం గురించి ఆలోచిస్తూ ఉన్నాను. ఇప్పుడు నేను మూడు ఫార్మాట్‌ల నుండి రిటైర్ అవ్వాలని నిర్ణయించుకున్నాను. ఇప్పుడు నాకు భారత జట్టులో అవకాశం రాదని నాకు తెలుసు, కాబట్టి నేను యువ క్రికెటర్లకు అవకాశం ఇవ్వడం మంచిది. ప్రపంచ వ్యాప్తంగా జరిగే టీ20 లీగ్‌లలో కూడా ఆడేందుకు ప్లాన్ చేస్తున్నాను" అని వివరించాడు. 2010-11లో విజయ్ హజారే ట్రోఫీ ఫైనల్‌లో జార్ఖండ్ విజేతగా నిలిచినప్పుడు అతను ప్లేయర్ ఆఫ్ ద మ్యాచ్‌గా ఎంపికవ్వడం అతని కెరీర్‌లో మరపురాని క్షణం.