తీగల కృష్ణారెడ్డి పార్టీ మారడం వెనుక ఇంత పెద్ద కథా!

టీడీపీ నుండి తీగల కృష్ణారెడ్డి రాజకీయ ప్రస్థానం మొదలైంది. హైదరాబాద్‌ నగర మేయర్‌గా, హైదరాబాద్‌ అర్బన్‌ డెవలప్‌మెంట్‌ అథారిటీ (HUDA) ఛైర్మన్‌గా పనిచేశారు. 2009లో రంగారెడ్డి జిల్లా మహేశ్వరం నియోజకవర్గం ఏర్పడినప్పుడు టీడీపీ అభ్యర్థిగా పోటీ చేసి.. సబితా ఇంద్రారెడ్డి చేతిలో ఓటమి పాలయ్యారు. 2014లో టీడీపీ తరపునే పోటీ చేసి కాంగ్రెస్‌ అభ్యర్థి మల్‌రెడ్డి రంగారెడ్డి మీద విజయం సాధించారు. ఆ తర్వాత టీఆర్ఎస్‌లో చేరిన తీగల 2018లో కాంగ్రెస్ అభ్యర్థిగా బరిలో దిగిన సబితా ఇంద్రారెడ్డి చేతిలో ఓడిపోయారు. ఆ తర్వాత సబితా ఇంద్రారెడ్డి కాంగ్రెస్‌ను వీడి టీఆర్ఎస్ లో చేరారు. గత స్థానిక సంస్థల ఎన్నికల్లో తీగల కృష్ణారెడ్డి కోడలు అనితారెడ్డి మహేశ్వరం జడ్పీటీసీగా గెలిచి, రంగారెడ్డి జడ్పీ ఛైర్‌పర్సన్‌ అయ్యారు. సబితా ఇంద్రారెడ్డి, తీగల కృష్ణారెడ్డి ఇద్దరూ కూడా ఒకే పార్టీలో ఉండటంతో ఆధిపత్య పోరు నడుస్తోంది. వచ్చే ఎన్నికల్లో మళ్లీ సిట్టింగులకే టికెట్ ఇస్తామన్న సంకేతాలు బీఆర్ఎస్ అధిష్ఠానం ఇవ్వటంతో తీగల కృష్ణారెడ్డి పార్టీ మారడానికే ఫిక్స్ అయ్యారని తెలుస్తోంది. ఇంకొద్ది రోజుల్లో అధికారిక ప్రకటన వచ్చేసే అవకాశం ఉంది.