'పుష్ప ది రూల్‌'.. ఓ ఎమోషనల్‌ జర్నీ..?

అల్లు అర్జున్‌, సుకుమార్‌ కాంబినేషన్‌లో వచ్చిన పుష్ప గురించి ఉపోద్ఘాతం వేరే అక్కర్లేదు. పాన్‌ ఇండియా సినిమాగా వచ్చి, అల్లు అర్జున్‌ని ఓవర్‌ నైట్‌ ఐకాన్‌ స్టార్‌ చేశాడు పుష్పరాజ్‌. ఇటీవల ఉత్తమ నటుడిగా జాతీయ అవార్డ్‌ అందుకుని తన కీర్తి కిరీటంలో మరో మణిమాణిక్యాన్ని అమర్చుకున్నాడు అల్లువారి వారసుడు. పూర్తి రస్టిక్‌ సినిమాగా తెరకెక్కిన పుష్ప ప్రేక్షకులని ఆశ్చర్యంలో ముంచెత్తింది. సుకుమార్‌ టేకింగ్‌, అర్జున్‌ నటన సినిమాను మరో స్థాయిలో నిలబెట్టాయి.

వచ్చే ఏడాది ఆగస్ట్‌ 15న రిలీజ్‌ కానున్న పుష్పరాజ్‌ రాజ్యం (ది రూల్‌)లో ఎమోషన్‌ కంటెంట్‌ ఎక్కువగా ఉండనున్నట్లు తెలుస్తోంది. పుష్పరాజ్‌ మీద పగ పెంచుకున్న నాలుగు పాత్రలతో మనకు మొదటి భాగం ముగుస్తుంది. ఎస్పీ భన్వర్‌ సింగ్‌ షెకావత్‌, పుష్ప చేతిలో చావు దెబ్బలు తిన్న జాలి రెడ్డి, తన తమ్ముడి చావుకు పగతో రగిలిపోయే అనసూయ, ఆమె భర్త మంగళం శీను. పుష్పని తన కుటుంబ సభ్యుడిగా అంగీకరించని సవతి అన్న అజయ్‌. వీళ్లంతా పుష్ప మీద పగ తీర్చుకోడానికి సిద్ధంగా ఉన్నారు.

అలాగే పుష్పరాజ్‌ని చూసి ‘చిన్నాయన’ అంటూ మురిసిపోయే అజయ్‌ కుమార్తె, అవమానాలను దిగమింగుకునే పుష్ప తల్లి, తన భర్తకి ఎదురయ్యే ప్రమాదాల గురించి ఆందోళన చెందే శ్రీవల్లి, తన ప్రాణాలను కాపాడినందుకు పుష్పకు మద్దతుగా నిలిచే జక్కారెడ్డి, కధానాయకుడి రైట్‌ హ్యాండ్‌ కేశవ... వీళ్లంతా రెండో భాగానికి కావాల్సినంత ఎమోషనల్‌ కంటెంట్‌ని అందించడానికి సిద్ధపడుతున్నారు. పుష్పరాజ్‌కి ఎమోషనల్‌ వీక్‌నెస్‌ అయి, అతని హీరోయిజాన్ని మరింత ఎలివేట్‌ చేయనున్నారు. రాబిన్‌ హుడ్‌లా పేదలకు అండదండగా హీరో ఉంటున్నాడని టీజర్‌లో చూపించాడు దర్శకుడు. అది కూడా ఎమోషనల్‌గా వర్కౌట్‌ కానుంది.

భారీ అంచనాలతో వచ్చే ఏడాది ఎర్ర చందనం సామ్రాజ్యాన్ని, భారతీయ సినిమాని ఏలడానికి వస్తున్నాడు పుష్ప. ‘కట్టప్పని బాహుబలి ఎందుకు చంపాడు?’ అనే ఒక్క ప్రశ్న బాహుబలి రెండో భాగం మీద ఆసక్తి పెంచితే... అల్లు అర్జున్‌ నటన, సుకుమార్‌ దర్శకత్వం, ఒకదానితో ఒకటి ముడిపడిన క్యారెక్టర్లు... పుష్ప రెండో భాగం కోసం దేశమంతా ఎదురు చూసేలా చేస్తున్నాయి.