అందుకే వైఎస్ జగన్ పై కేసు.. ఆ విషయం గుర్తు పెట్టుకోండి

ఈ పరిణామాలపై వైసీపీ నేత అంబటి రాంబాబు తాజాగా స్పందించారు. రాజకీయ ఒత్తిళ్లకు లొంగి పోలీసుయంత్రాంగం వైఎస్‌ జగన్‌ మోహన్ రెడ్డిపై అక్రమంగా కేసులు పెట్టారని ఆరోపించారు. రెడ్‌బుక్‌ అమలు చేయడంలో భాగంగానే జగన్‌తో పాటు ఇద్దరు ఐపీఎస్‌, మరో ఇద్దరు అధికారులపై నమోదు చేశారని ఆరోపించారు. 2021లో అప్పటి ఎంపీ రఘురామరాజుపై వైసీపీ ప్రభుత్వం చట్టపరంగా కేసులు నమోదు చేసిందని తెలిపారు. ఇటీవల ఎన్నికల్లో పార్టీ మారి టీడీపీ (TDP) నుంచి ఎమ్మెల్యేగా గెలిచిన తరువాత జగన్‌పై కక్ష తీర్చుకోవడానికి చంద్రబాబు, లోకేష్‌తో మిలాఖతై అధికారులకు ఆదేశాలు జారీ చేసి జగన్‌పై కేసులు నమోదు చేశారని ఆరోపించారు. కాలం గిర్రున మళ్లీ తిరిగి వస్తుందన్న విషయాన్ని గుర్తుపెట్టుకోవాలని అధికారులకు సూచించారు.