Chandrababu: చంద్రబాబు ఆ ఆదేశాలతో వారికి కష్టాలు తప్పినట్లేనా?

గతంలో తెలుగుదేశం ప్రభుత్వం అధికారంలో ఉన్నప్పుడు నెలలు నిండిన గర్భిణుల కోసం వసతి గృహాలను ఏర్పాటు చేశారు. తిరిగి వాటిని తెరవాలని ముఖ్యమంత్రి చంద్రబాబు అధికారులను ఆదేశించారు. నెలలు నిండిన గర్భిణులను డోలీలో తీసుకెళ్లకుండా వెంటనే మానవీయ కోణంలో ఆలోచించి అందుకు తగిన చర్యలు తీసుకోవాలని అధికారులను ఆదేశించారు. డోలీ మోతలు ఇక ఏజెన్సీ ప్రాంతంలో కనిపించ కూడదని అధికారులకు చంద్రబాబు స్పష్టమైన ఆదేశాలు జారీ చేశారు. వారికి అవసరమైన వైద్య సౌకర్యాలను అక్కడికక్కడే అందించేలా ఏర్పాటు చేయాలని కూడా అధికారులను కోరారు. డోలీ కనపడితే సంబంధిత అధికారులపై చర్యలుంటాయని ఆయన హెచ్చరించారు. వచ్చే నెలలో అంతర్జాతీయ గిరిజన దినోత్సవాన్ని ఘనంగా నిర్వహించాలని చంద్రబాబు అధికారులను ఆదేశించారు. దీంతో గిరిజనుల పట్ల చంద్రబాబు ప్రభుత్వం ప్రత్యేక శ్రద్ధ పెట్టినట్లు కనిపిస్తుంది.