40వేల రూపాయల ఇంజెక్షన్ ఫ్రీ.. ఏపీ ప్రభుత్వం గొప్ప ఆలోచన

ఎస్‌టీ ఎలివేషన్‌ మయోకార్డియల్‌ ఇన్‌ఫార్‌క్షన్‌ (స్టెమి)గా పిలిచే ఈ కార్యక్రమం ద్వారా గుండెపోటు బాధితులకు గోల్డెన్‌ అవర్‌లో 40 నిమిషాల్లోనే చికిత్స అందిస్తారు. సెప్టెంబర్ 29 నుంచి కర్నూలు, గుంటూరు, విశాఖపట్నం కేంద్రంగా ప్రాజెక్టును అమలు చేస్తారు. జనవరి నుంచి రాష్ట్రవ్యాప్తంగా విస్తరిస్తారు. స్టెమీ అంటే గుండె రక్తనాళం 100 శాతం పూడిపోవడంతో వచ్చే గుండెపోటు.. బాధితులకు వీలైనంత త్వరగా ఆ పూడికను కరిగించే చికిత్స (థ్రాంబోలైసిస్‌ ఇంజక్షన్‌)ను ఇవ్వగలిగితే ప్రాణాలను కాపాడవచ్చు అంటున్నారు.ఇండియన్ కౌన్సిల్ ఆఫ్ మెడికల్ రీసెర్చ్ (ఐసీఎంఆర్) సహకారంతో స్టెమి కార్యక్రమాన్ని పైలట్ ప్రాజెక్టుగా ప్రారంభించామని ప్రిన్సిపల్ సెక్రటరీ (వైద్యారోగ్య, కుటుంబ సంక్షేమ శాఖ) ఎంటీ కృష్ణబాబు తెలిపారు.

ఈ ప్రాజెక్టులో భాగంగా ముందుగా గ్రామ స్థాయిలో వైద్య సిబ్బందికి శిక్షణ అందిస్తారు. సమీపంలో ఉన్న పీహెచ్ సీలలో ఇనీషియల్ట్రీట్మెంట్ ఇస్తారు. గోల్డెన్ అవర్ లో రోగికి ఇవ్వాల్సిన ఇంజెక్షన్ ను ఉచితంగా అందిస్తారు. సాధారణంగా ఈ ఇంజెక్షన్ ఖరీదు రూ.40 వేలు. అనంతరం 100 కి.మీల పరిధిలో క్యాథ్ లాబ్స్ ఉన్న డిస్ట్రిక్ట్ హబ్ హాస్పిటల్ కు రోగిని తరలించి అవసరమైన టెస్టులు, శస్త్రచికిత్స చేస్తారు. అవసరమైన సౌకర్యాలు, సిబ్బంది నియామకాలను కూడా రాష్ట్ర ప్రభుత్వం చేపట్టింది. రూ.120 కోట్లు వెచ్చించి క్యాథ్ లాబ్స్ ను నిర్మించింది. గుంటూరు, కర్నూలు, చిత్తూరు, విశాఖపట్నంలోని ప్రభుత్వ ఆస్పత్రులను హబ్స్ గా చేసి ఈ జిల్లాల పరిధిలో 61 స్పోక్స్ సెంటర్లను ఏర్పాటు చేసి హార్ట్ కేర్ సర్వీసులను సామాన్యులకు, గ్రామీణులకు అందుబాటులోకి తెచ్చింది. అవసరమైన వారికి రూ.40 వేలు విలువ చేసే థ్రాంబోలైసిస్‌ ఇంజక్షన్‌ ఉచితంగా బాధితులకు ఇస్తారు. గ్రామీణ ప్రాంతాల్లో ఏఎన్‌ఎంలు, ఫ్యామిలీ డాక్టర్, సీహెచ్‌వోల ద్వారా గుండెపోటు లక్షణాలపై ప్రజల్లో అవగాహన కల్పించనున్నారు. రాష్ట్రంలోని 11 మెడికల్ కాలేజీలు, ప్రభుత్వ ఆసుపత్రుల్లో కార్డియాలజీ, క్యాథ్ ల్యాబ్, సీటీవీఎస్ విభాగాల్లో 94 పోస్టులను మంజూరు చేయాలని ప్రభుత్వం నిర్ణయించింది.