Fengal Cyclone : నెమ్మదిగా కదులుతున్న తీవ్ర వాయుగుండం.. రేపు తుపానుగా మారే అవకాశం

శుక్రవారం ఉదయానికి తీవ్ర వాయుగుండం తుపాను గా మారే అవకాశముందని వాతావరణ శాఖ చెప్పింది. శనివారం ఉదయం ఉత్తర తమిళనాడు-పుదుచ్చేరి తీరాల సమీపంలో కారైకాల్ మరియు మహాబలిపురం మధ్య తీవ్ర వాయుగుండంగా తీరం దాటే అవకాశం ఉందని కూడా వాతావరణ శాఖ అధికారులు పేర్కొన్నారు. దీని ప్రభావంతో మూడు రోజులు అంటే ఈరోజు నుంచి ఎల్లుండి వరకూ దక్షిణకోస్తాంధ్రలో అక్కడక్కడ భారీ వర్షాలు పడే అవకాశముందని తెలిపారు. ఇక రాయలసీమలోని పలు జిల్లాల్లోనూ శుక్ర, శనివారాల్లో అక్కడక్కడ భారీవర్షాలు పడతాయని వాతావరణ శాఖ అధికారులు హెచ్చరికలు జారీ చేశారు.

మిగిలినచోట్ల విస్తారంగా తేలికపాటి నుంచి మోస్తరు వర్షాలు పడే అవకాశం ఉందని వాతావరణ శాఖ తాజా అప్ డేట్ లో తెలిపింది. సాయంత్రానికి తీరం వెంబడి గంటకు 40 నుంచి 50 కిలోమీటర్లు గరిష్టంగా 60 కిలోమీటర్లు వేగంతో ఈదురుగాలులు వీచే అవకాశం ఉందని వాతావరణ శాఖ అధికారులు పేర్కొన్నారు.సాయంత్రం నుంచి శనివారం ఉదయం వరకు గంటకు 50 నుంచి 60 కిలో మీటర్ల గరిష్టంగా 70 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది. దక్షిణ కోస్తా తీర ప్రాంతంలో మత్స్యకారులు సముద్రంలోకి వేటకు వెళ్లరాదని సూచించారు. ప్రజలు అప్రమత్తంగా ఉండాలని, రైతులు తగిన జాగ్రత్తలు తీసుకోవాలని కూడా వాతావరణ శాఖ అధికారులు తెలిపారు.