Tirumala : తిరుమలలో ఆదివారం కూడా భక్తుల రద్దీ అంతగా లేదే?

మరోవైపు రథసప్తమికి సంబంధించిన ఏర్పాట్లను తిరుమల తిరుపతి దేవస్థానం అధికారులు చేస్తున్నారు. ఫిబ్రవరి 4వ తేదీన రథసప్తమి వేడుకలు పెద్దయెత్తున జరగనుందున అందుకు తగిన ఏర్పాట్లను చేస్తున్నారు. తిరుపతిలో జరిగిన తొక్కిసలాట వంటి ఘటనలు జరగకుండా అధికారులు ముందస్తు ఏర్పాట్లు చేయడానికి సిద్దమవుతున్నారు. వాహన సేవలు కూడా ఉండటంతో భక్తులు పెద్ద సంఖ్యలో తరలి వచ్చే అవకాశముందని భావించిన టీటీడీ అధికారుల అందుకు అనుగుణంగా ఏర్పాట్లు చేస్తున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని ఆరు కంపార్ట్ మెంట్లలోనే భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో వేచి ఉన్న భక్తులకు శ్రీవారి దర్శనం ఎనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన వారికి రెండు నుంచి మూడు గంటల సమయం పడుతుంది. నిన్న తిరుమల శ్రీవారిని 80,871 మంది భక్తులు దర్శించుకున్నారు. వీరిలో 24,257 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.78 కోట్ల రూపాయలు వచ్చిందని అధికారులు తెలిపారు.