Tirumala : తిరుమలలో తగ్గని భక్తుల రద్దీ

తిరుమలలో గతంలో కంటే ఎక్కువ సంఖ్యలో భక్తులు చేరుకుంటుండటంతో నీటి సమస్య కూడా తలెత్తుతుందని అధికారులు చెబుతున్నారు. పబ్లిక్ కొళాయిలను తిరుమలలో బంద్ చేయడంపై భక్తులు నిరసన వ్యక్తం చేశారు. భవిష్యత్ ను దృష్టిలో పెట్టుకుని నీటిని పొదుపుగా వాడుకోవాలని అధికారులు సూచిస్తున్నారు. ఈరోజు తిరుమలలోని వైకుంఠం క్యూ కాంప్లెక్స్‌లోని పథ్నాలుగు కంపార్ట్‌మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉన్న భక్తులకు శ్రీవారి దర్శనం పన్నెండు గంటల సమయం పడుతుంది. టైమ్ స్లాట్ టోకెన్లు ఉన్న భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు రెండు నుంచి మూడు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. నిన్న తిరుమల శ్రీవారిని 71,153 మంది భక్తులు దర్శించుకున్నారు. వీరిలో 25,863 మంది భక్తులు తమ తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 4.32 కోట్ల రూపాయలు వచ్చిందని అధికారులు తెలిపారు.