అచ్యుతాపురంలో భారీ అగ్ని ప్రమాదం.. ఇద్దరు మృతి

అనకాపల్లి జిల్లాలో భారీ అగ్ని ప్రమాదం సంభవించింది. శుక్రవారం మధ్యాహ్నం అచ్యుతాపురం సెజ్‌లోని సాహితీ ఫార్మా కంపెనీలో రెండు రియాక్టర్లు పేలాయి. పెట్రో ఉత్పత్తులు అధికంగా ఉండే కంపెనీలో పేలుడు సంభవించింది. దీంతో భారీగా మంటలు చెలరేగాయి. రియాక్టర్లు పేలడంతో మంటలు ఉవ్వెత్తున ఎగసిపడుతున్నాయి. కార్మికులు ఒక్కసారిగా భయంతో బయటకు పరుగులు తీశారు. ఈ ప్రమాదంలో ఇద్దరు మృతి చెందగా, పలువురికి గాయాలైనట్లు సమాచారం. గాయపడిన వారిని చికిత్స నిమిత్తం ఆస్పత్రికి తరలించారు. మరికొందరు లోపల చిక్కుకున్నట్లు తెలుస్తోంది.

ఫార్మా కంపెనీ చుట్టు పక్కల మొత్తం దట్టమైన పొగ కమ్ముకుంది. స్థానికుల ద్వారా విషయం తెలుసుకున్న అగ్ని మాపక సిబ్బంది వెంటనే సంఘటనా స్థలానికి చేరుకున్నారు. మూడు ఫైరింజన్లతో అగ్నిమాపక దళాలు మంటలను అదుపు చేస్తున్నాయి. చుట్టు పక్కల ఫ్యాక్టరీలకు మంటలు అంటకుండా ఫైరింజన్‌ సిబ్బంది శ్రమిస్తున్నారు. రియాక్టర్లు పేలడంతో భారీ శబ్దాలు వచ్చాయి. దీంతో స్థానికులు తీవ్ర భయాందోళనకు గురయ్యారు. ఈ ఘటనపై కేసు నమోదు చేసుకున్న పోలీసులు.. దర్యాప్తు చేస్తున్నారు. ప్రమాదం ఎలా జరిగిందనే కోణంలో దర్యాప్తు కొనసాగుతోంది.