Andhra Pradesh : ఈరోజు ఏపీలో పెన్షన్ ఫెస్టివల్.. వృద్ధుల చేతుల్లో ఏడు వేల రూపాయల నగదు..దివ్యాంగులకు పదిహేను వేలు

గత ప్రభుత్వం మాదిరిగానే వృద్ధుల ఇళ్లకు వెళ్లి ఇవ్వాలని ప్రభుత్వం ఆదేశాలు జారీ చేసింది. అయితే వాలంటీర్లు మాత్రం కాదు. వార్డు, గ్రామ సచివాలయ సిబ్బంది ఈ పింఛనును ఈరోజు ఉదయం నుంచి అందచేస్తున్నారు. తమ చేతుల్లో ఏడు వేల రూపాయలు ఒక్కసారి రావడంతో వారి ముఖాలు ఆనందంతో వెలిగిపోతున్నాయి. ఇప్పటి వరకూ మూడు వేలు వణుకుతూ అందుకున్న ఆ చేతులు.. ధైర్యంగా ఏడు వేల రూపాయల అందుకోవడానికి పండుటాకులు సిద్ధమయ్యారు. ఈ నెల పింఛను మొత్తం తో పాటు చంద్రబాబు నాయుడు సంతకంతో కూడిన లేఖను కూడా లబ్దిదారులకు అందచేస్తున్నారు. ఒక్కొక్క సచివాలయం ఉద్యోగికి యాభై గృహాలను కేటాయించారు.

ఆంధ్రప్రదేశ్ లో మొత్తం మొత్తం 65.12 లక్షల మంది పింఛను దారులకు ఏడు వేల రూపాయల చొప్పున పింఛను మొత్తాన్ని ఈరోజు నుంచి చెల్లించనున్నారు. ఇందుకోసం ప్రభుత్వం 4,408 కోట్ల రూపాయల నిధులను విడుదల చేసింది. చంద్రబాబు కూడాస్వయంగా లబ్దిదారుడి ఇంటికి వెళ్లి నగదును అందచేశారు. తాడేపల్లి మండలం పెనుమాక గ్రామంలో ఒక లబ్దిదారుడికి స్వయంగా ముఖ్యమంత్రి చంద్రబాబు అందించేలా అధికారులు ఏర్పాట్లు చేశారు. ఉదయం నుంచే ఈ పింఛను పంపిణీ ప్రక్రియ ప్రారంభం కావాలని చీఫ్ సెక్రటరీ నీరబ్ కుమార్ ప్రసాద్ ఆదేశాలు జారీ చేశారు. లబ్దిదారులందరికీ పింఛను అందేలా చర్యలు తీసుకోవాలని ఆయన ఉత్తర్వుల్లో పేర్కొన్నారు. ఈరోజు రాష్ట్రమంతటా పింఛన్ల పండగ జరుపుకోవాలని టీడీపీ తరుపున నేతలు ఆదేశించడంతో పల్లెల నుంచి పట్టణాల వరకూ పండగ వాతావరణం నెలకొంది.