ఎన్టీఆర్ నన్ను పెళ్లి చేసుకున్నారో లేదో చెప్పాల్సింది వాళ్లే: లక్ష్మీ పార్వతి

ఎన్టీఆర్ ప్రాణాలు తీసిన వాళ్ళు వారసులుగా చలామణి అవుతున్నారని.. భార్యగా నాణెం అందుకోవడానికి అర్హత తనకే ఉందని అన్నారు లక్ష్మీ పార్వతి. ప్రాణాలు తీసిన వాళ్ళు నాణెం విడుదలకు వెళ్లారని.. ఎన్నికల సమయంలో ఎన్టీఆర్‌ను వాడుకుంటున్నారన్నారు. ఎన్టీఆర్ తనను వివాహం చేసుకున్నారో లేదో ఆయన పిల్లలు సమాధానం చెప్పాలన్నారు. తనను పిలవకుండా పురందేశ్వరి, చంద్రబాబు అడ్డుకున్నారని.. ఎన్టీఆర్ భార్యను అని మెడలో ఫోటో పెట్టుకుని తిరగాలా అని ప్రశ్నించారు. ఆయనతో వివాహమైనట్లు ఫోటోలు, వార్తా కథనాలు ఉన్నాయన్నారు. ఇంతకాలం ఎన్టీఆర్ కుటుంబంపై అభిమానంతో సైలెంట్‌గా ఉన్నానని.. ఇకపై ఆ కుటుంబాన్ని వదిలిపెట్టనన్నారు. చంద్రబాబు, పురందేశ్వరి, బాలకృష్ణ అందరినీ బయటకు లాగుతానన్నారు. వచ్చే ఎన్నికల తర్వాత వీళ్లు రాజకీయాల్లో ఉండకుండా చేస్తానన్నారు. వీళ్ల గురించి ఎన్టీఆర్ ఏమన్నారో ప్రజలకు వివరిస్తానన్నారు. ఎన్నాళ్లని వీళ్ల నుంచి అవమానాలు పడుతూ ఉండాలన్నారు. ఎన్టీఆర్ కష్టాల్లో ఉంటే పురందేశ్వరి వచ్చారా అని ప్రశ్నించారు. తనను ఎందుకు చులకన చేస్తున్నారని, తనను చులకన చేస్తే ఎన్టీఆర్‌ను చేసినట్టే అన్నారు. భువనేశ్వరి, పురందేశ్వరిలు తండ్రికి ద్రోహం చేశారని అన్నారు. కేంద్రం భారతరత్న ఇస్తానంటే పురందేశ్వరి అడ్డుకున్నారని ఆరోపించారు.