బంగాళాఖాతంలో అల్పపీడనం.. కోస్తాంధ్రకు భారీ వర్షసూచన
అల్పపీడన ప్రభావంతో రానున్న 48 గంటల్లో (శనివారం వరకు) కోస్తాంధ్ర వ్యాప్తంగా భారీ నుంచి అతిభారీ వర్షాలు కురుస్తాయని..
కోస్తాంధ్రలో గురువారం ఉదయం నుంచి తేలికపాటి నుంచి మోస్తరు వర్షాలు కురుస్తున్నాయి. ఈ సందర్భంలో విపత్తు నిర్వహణశాఖ మరో విషయం తెలిపింది. తూర్పు మధ్య బంగాళాఖాతం, పశ్చిమ మధ్య బంగళాఖాతం నడుమ అల్పపీడనం ఏర్పడిందని ఏపీ విపత్తుల నిర్వహణ శాఖ వెల్లడించింది. ఈ అల్పపీడనం రాగల 48 గంటల్లో మరింత బలపడుతుందని పేర్కొంది. ఇది ఉత్తరాంధ్ర, దక్షిణ ఒడిశా తీరాల వైపు పయనిస్తుందని తెలిపింది.
అల్పపీడన ప్రభావంతో రానున్న 48 గంటల్లో (శనివారం వరకు) కోస్తాంధ్ర వ్యాప్తంగా భారీ నుంచి అతిభారీ వర్షాలు కురుస్తాయని, ఈ సమయంలో పిడుగులు కూడా పడవచ్చని హెచ్చరించింది. వర్షాల సమయంలో రైతులు పొలాల్లో ఉండకపోవడం మంచిదని సూచించింది. ఏపీ వ్యాప్తంగా విస్తారంగా వర్షాలు కురుస్తాయని వెల్లడించింది. అల్పపీడనం కారణంగా సముద్రం అలజడిగా ఉంటుందని, మత్స్యకారులు వేటకు వెళ్లరాదని విపత్తుల నిర్వహణశాఖ హెచ్చరించింది.
