Perni Nani : పేర్నినాని అరెస్ట్ కు రంగం సిద్ధం...ముందస్తు బెయిల్ కు యత్నం

రేషన్ బియ్యం మాయం కేసులో అరెస్టయిన నలుగురికి న్యాయస్థానం పథ్నాలుగు రోజులు రిమాండ్ విధించింది. ఈ కేసులో పేర్ని నాని ప్రమేయం ఉందని గుర్తించిన పోలీసులు ఆయనపై కేసు నమోదు చేశారు. దీంతో నానిని ఏ క్షణంలోనైనా అరెస్ట్ చేసే అవకాశముందని తెలుస్తోంది. తన భార్య పేరిట మచిలీపట్నంలో గోదామును నిర్మించి అందులో పౌర సరఫరాల శాఖకు చెందిన బియ్యాన్ని నిల్వ ఉంచారు. అందులో నుంచి బియ్యం మాయమయ్యాయని తేలడంతో కొంత మొత్తాన్ని పేర్ని నాని కుటుంబం చెల్లించింది. అయితే 3కోట్లకు పైగా చెల్లించాలంటూ పౌరసరఫరాల శాఖ అధికారులు తిరిగి నోటీసులు జారీ చేశారు. అయితే దీనికి సంబంధించి ఇంకా పేర్ని నాని కుటుంబం ఇంకా మిగిలిన నిధులను చెల్లించలేదు.

ఈ కేసులో పేర్ని నాని సతీమణి జయసుధ పేరును ఏ1 నిందితురాలిగా చేర్చారు. అయితే పేర్నినాని జయసుధకు మచిలీపట్నం కోర్టు ముందస్తు బెయిల్ మంజూరు చేసింది. ఈ కేసులో పేర్ని నాని కొద్దిసేపటి క్రితం హైకోర్టులో ముందస్తు బెయిల్ పిటీషన్ దాఖలు చేశారు. లంచ్ మోషన్ పిటీషన్ వేశారు. తనను అరెస్ట్ చేయకుండా ముందస్తు బెయిల్ ఇవ్వాలంటూ కోరారు. అయితే దీనిపై విచారణ జరగాల్సి ఉంది. లంచ్ మోషన్ పిటీషన్ లో పేర్ని నానికి ఊరట దక్కకుంటే ఈరోజు ఆయనను అరెస్ట్ చేసే అవకాశాలున్నాయి. మచిలీపట్నంలో ఇప్పటికే భారీ బందోబస్తు ఏర్పాటు చేయడానికి పోలీసుల రెడీ అవుతుండటంతో ఆయనను అరెస్ట్ చేస్తారన్నప్రచారం జరుగుతుంది.