Tirumala : తిరుమలలో నేడు ఒక్కసారిగా పెరిగిన రద్దీ.. దర్శన సమయం ఎంతంటే?

ఈరోజు తిరుమలలోని వీధులన్నీ భక్తులతో కళకళలాడుతున్నాయి. గోవింద నామ స్మరణలతో మాడవీధులు మార్మోగిపోతున్నాయి. వెంకటేశ్వరస్వామిని దర్శించుకునేందుకు అధిక సంఖ్యలో భక్తులు రావడంతో కంపార్ట్ మెంట్లలో కూడా భక్తుల సందడి కనిపిస్తుంది. ఇటు లడ్డూ కౌంటర్ల వద్ద, అన్నప్రసాదం సత్రం వద్ద కూడా రష్ అధికంగానే ఉంది. ఇక శుక్రవారం నుంచి ఆదివారం వరకూ భక్తుల రద్దీ మరింత ఎక్కువగా ఉంటుందని తిరుమల తిరుపతి దేవస్థానం అధికారులు అంచనా వేస్తున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని ఎనిమిది కంపార్ట్ మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో వేచి ఉన్న భక్తులకు శ్రీవారి దర్శనం పన్నెండు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం రెండు నుంచి మూడు గంటల సమయం పడుతుంది. నిన్న తిరుమల శ్రీవారిని 63,285 మంది భక్తులు దర్శించుకున్నారు. వీరిలో 20,829 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.11 కోట్ల రూపాయలు వచ్చిందని అధికారులు తెలిపారు.