Tirumala : ఈరోజు తిరుమలలో రద్దీ మామూలుగా లేదుగా?

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. శ్రీవారి దర్శనం కోసం క్యూ లైన్ బయట కృష్ణతేజ గెస్ట్ లైన్ వరకూ విస్తరించింది. పెద్ద పెద్ద క్యూ లైన్లలో భక్తులు దర్శనం కోసం వేచి చూస్తున్నారు. ఉచిత దర్శనం క్యూ లైన్ లోకి ఈరోజు ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం 24 గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం టోకెన్లున్న భక్తులకు మాత్రం ఆరు నుంచి ఏడు గంటల్లో దర్శనం పూర్తవుతుంది. ఇక మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 71133 మంది భక్తులు దర్శించుకున్నారు. వీరిలో 35,502 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.28 కోట్ల రూపాయలు మాత్రమే వచ్చిందని అధికారులు తెలిపారు.