YSRCP : చంద్రబాబు ప్రమాణస్వీకారానికి రెండు రోజులు ముందుగానే.. జగన్ కీలక నిర్ణయం

ఓడిపోయామని కుంగిపోకుండా కార్యకర్తల్లో భరోసా నింపేందుకు ఆయన కీలక నిర్ణయం తీసుకున్నారు. వైసీపీ కేంద్ర కార్యాలయం ఈ నెల 10వ తేదీ నుంచి ప్రారంభించాలని నిశ్చయించారు. అంటే చంద్రబాబు ప్రమాణస్వీకారం చేయడానికి రెండు రోజులు ముందు పార్టీ కేంద్ర కార్యాలయంలో అందుబాటులో ఉంచాలని నేతలకు ఆదేశాలు జారీచేశారు. అవసరమైతే జగన్ కూడా కార్యకర్తలతో సమావేశమవ్వాలని నిర్ణయించుకున్నారు. తాను నివాసం ఉంటున్న తాడేపల్లి లోనే పార్టీ కేంద్ర కార్యాలయం పని ప్రారంభించడానికి సిద్ధమవుతుంది. అందుకు ప్రత్యేకంగా సిబ్బందితో పాటు నేతలు కూడా అందుబాటులో ఉండేలా చర్యలు తీసుకోనున్నారు. కార్యకర్తలు భయపడకుండా వారిలో భరోసా నింపేందుకు ఈ నిర్ణయం తీసుకున్నారు.

మొన్నటి వరకూ తాడేపల్లిలోని తన నివాసం సీఎం క్యాంప్ కార్యాలయంగా ఉంది. అయితే దానిని పార్టీ కేంద్ర కార్యాలయంగా మారుస్తూ నిర్ణయం తీసుకున్నారు. పార్టీ కార్యాలయంలో న్యాయసలహాలు, సహకారం అందించేందుకు లీగల్ టీం కూడా అందుబాటులో ఉండేలా చూస్తున్నారు. ఏపీలో ఫలితాల అనంతరం జరుగుతున్న ఘర్షణలతో పాటు నమోదవుతున్న కేసుల విషయంలో కూడా వారికి ఉచితంగా న్యాయసాయం అందించేందుకు సిద్ధమవుతున్నారు. కార్యకర్తలకు నిరంతరం అందుబాటులో ఉంటూ.. వారి నుంచి ఓటమికి గల కారణాలను కూడా ఫీడ్ బ్యాక్ తీసుకునే ప్రయత్నం చేస్తారంటున్నారు. ఓటమికి తాము చేసిన తప్పొప్పులను కూడా ఆయన సమీక్షించుకోనున్నారని తెలిసింది. మొత్తం మీద ఐదో తేదీ ఫలితాలు వస్తే పదోతేదీన తిరిగి జగన్ యాక్టివ్ అవుతుండటం వైసీపీ వర్గాల్లో కొంత జోష్ నింపుతుంది.