Tirumala : తిరుమలలో అమాంతం పెరిగిన హుండీ ఆదాయం... ఎంతంటే?

ఆంధ్రప్రదేశ్ నుంచి మాత్రమే కాకుండా ఇతర రాష్ట్రాల నుంచి భక్తులు ఎక్కువ సంఖ్యలో తరలి వస్తున్నారు. ప్రధానంగా పొరుగు రాష్ట్రమైన తమిళనాడు నుంచిభక్తులు అధిక సంఖ్యలో తరలి వస్తున్నారు. ఎస్.ఎస్.డి. టోకెన్లు రోజు వారీగా జారీ చేస్తుండటంతో భక్తులు కూడా దర్శనం దొరుకుతుందని ముందుగానే తిరుపతికి చేరుకుని టోకెన్లు పొందుతున్నారు. దీంతో పాటు ముందుగా ప్రత్యేక దర్శనం టిక్కెట్లు బుక్ చేసుకున్న భక్తులు కూడా తరలి వస్తుండటంతో తిరుమలలో రద్దీ పెరిగింది. దీంతో తిరుమలలోని వీధులన్నీ గోవింద నామ స్మరణతో మారుమోగిపోతున్నాయి. అన్నప్రసాదం, లడ్డూ కౌంటర్ల వద్ద కూడా భక్తుల రద్దీ అధికంగానే ఉంది.

ఈరోజు తిరుమలలోని వైకుంఠం క్యూ కాంప్లెక్స్ లోని ముప్ఫయి కంపార్ట్ మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం ఎనిమిది గంటలకు పైగానే సమయం పడుతుందని తిరుమల తిరుపతి దేవస్థానం అధికారులు తెలిపారు. నిన్న తిరుమల శ్రీవారిని 59,776 మంది భక్తులు దర్శించుకున్నారు. వీరిలో 22,386 మంది భక్తులు తలనీలాలను సమర్పించి మొక్కులు చెల్లించుకున్నారు. టైమ్ స్లాట్ దర్శనం భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన వారికి శ్రీవారి దర్శనం మూడు నుంచి నాలుగు గంటల సమయం పడుతుంది. నిన్న తిరుమల శ్రీవారి హుండీ ఆదాయం 4.24 కోట్ల రూపాయలు వచ్చింది.