Tirumala Laddu Controversy : తిరుమల లడ్డూ వివాదం కథ ముగిసినట్లేనా? కథ కొండకేనా?

ఉప ముఖ్యమంత్రి పవన్ కల్యాణ్ అయితే లడ్డూ వివాదంపై ఆయన సనాతన ధర్మ దీక్ష చేపట్టారు. తిరుపతిలో భారీ బహిరంగ సభ పెట్టి అందరినీ తూర్పారబట్టారు. బెజవాడ కనకదుర్గమ్మ ఆలయంలోని మెట్లను శుభ్రపర్చారు. చాలా సీన్ క్రియేట్ చేశారు. రచ్చ రచ్చ అయింది. అధికార, ప్రతిపక్ష పార్టీలు ఒకరిపై ఒకరు దుమ్మెత్తి పోసుకున్నారు. తిరుమల తిరుపతి దేవస్థానం ఈవో శ్యామలరావు సయితం తిరుమల లడ్డూ తయారీలో కల్తీ జరిగిందని చెప్పారు. భక్తుల నుంచి ఫిర్యాదులు కూడా వచ్చాయని చంద్రబాబు చెప్పారు. దీంతో సుప్రీంకోర్టుకు వెళ్లారు వైసీపీ నేతలు. సుప్రీంకోర్టు ఒక ప్రత్యేక దర్యాప్తు బృందాన్ని నియమించింది. దీని వరకూ అందరికీ తెలిసిందే.

అయితే ఇప్పటి వరకూ దానిపై ఎటూ తేల్చకుండా వదిలేశారు. ఆరోపణలు చేసి వదిలేసుకున్నంత మాత్రాన, విమర్శలు చేసి వదిలేసినంత సులువుగా భక్తుల మనోభావాలు తిరిగి పూర్వ స్థితికి చేరలేదన్నది వాస్తవం. ఎందుకంటే తిరుమలకు వెళ్లే ప్రతి భక్తుడికీ లడ్డూ కొనుగోలు చేసినప్పుడల్లా ఆ వివాదమే గుర్తుకు వస్తుంది. సుప్రీంకోర్టు నియమించిన కమిటీ విచారణ ఇంత వరకూ చేపట్టలేదు. తిరుమలకు వచ్చే భక్తులే కాదు.. కోట్లాది మంది భక్తులకు సంబంధించిన విషయం కావడంతో కొంత సెన్సిటివ్ విషయమైనా దానిని తేల్చాల్సిన అవసరం ఉంది. నెలలు గడుస్తున్నా తేల్చకపోతే కోట్లాది మంది భక్తుల మనసులో తలెత్తిన సందేహాలకు ఎవరు తెరదించాల్సి ఉంటుంది. వారి సందేహాలను నివృత్తి చేయాల్సిన బాధ్యత వ్యవస్థలోని అందరికీ ఉంది. లేకపోతే తిరుమల లడ్డూ వివాదం ఇక కంచికి చేరినట్లేనని అనుకోవాల్సి ఉంటుంది.