జరగబోయేది క్లాస్ వార్ : జగన్

ఇచ్చిన హామీలను నాలుగేళ్లలో అమలు చేసిన ఘనత మన ప్రభుత్వానిదేనని జగన్ అన్నారు. జగనన్న చేదోడు కార్యక్రమం కింద నిధులను లబ్దిదారులకు విడుదల చేశారు. ఈ పథకం ద్వారా పదిహేను లక్షల మంది చిరు వ్యాపారులకు అందచేస్తున్నామని తెలిపారు. ఇప్పటి వరకూ 2,906 కోట్ల రూపాయలను వారి ఖాతాల్లోకి నాలుగేళ్లలో వేశామని చెప్పారు. గతంలో ఇలాంటి కార్యక్రమాలు ఎప్పుడైనా జరిగాయా? అని జగన్ ప్రశ్నించారు. ప్రతి పేదవాడి కుటుంబానికి తోడుగా ఉండే అడుగులు పడింది ఈ ప్రభుత్వ హయాంలో కాదా? అని ఆయన ప్రశ్నించారు. ఏ పేద కుటుంబమైనా ఏం కోరుకుంటుందని? కేవలం వైద్యం, విద్య మాత్రమేనని అన్నారు. ప్రభుత్వమే తమ ఇంటికి వచ్చి అన్నీ ఇవ్వడాన్ని ఎప్పుడైనా చూశారా? అని ముఖ్యమంత్రి జగన్ అన్నారు.

ఒక ప్రభుత్వం ఇలా వచ్చి లంచాలు లేకుండా పార్టీలకు, కులాలకు అతీతంగా సంక్షేమ పథకాలు అమలవుతాయని ఎవరైనా ఊహించారా? అని అడిగారు. 52 నెలల కాలంలో గతంలో ఎన్నడూ లేని విధంగా అమలు జరిగాయన్నారు. గతంలోనూ అదే బడ్జెట్ అని, అదే రాష్ట్రమని కానీ ముఖ్యమంత్రి మారాడని, కానీ అప్పుడు ఎందుకు ఈ పథకాలు రాలేదని ఆయన ప్రశ్నించారు. గతానికి, ఇప్పటికి తేడా ఏమిటో ఆలోచన చేయమని కోరారు. అప్పట్లో గజదొంగల ముఠా రాష్ట్రాన్ని దోచుకుతిందని ఆరోపించారు. దోచుకోవడం, దాచుకోవడమే పనిగా పెట్టుకుంటే ఇప్పుడు నేరుగా అక్కచెల్లెమ్మల ఖాతాల్లోకి నగదును జమ చేస్తున్నామని తెలిపారు. ప్రతి కుటుంబం మంచి విద్యను అందించి తమ పిల్లలకు అందించాలని కోరుకుంటుందని ఆయన అన్నారు. పేదలకు అండగా నిలచే ప్రభుత్వం కావాలని కోరుకుంటుందన్నారు.