భారత్-పాక్ ఆసియా కప్ మ్యాచ్.. థ్రిల్లర్ లో విన్నర్ గా నిలిచిన భారత్

చాలా రోజుల తర్వాత భారత్-పాకిస్థాన్ మ్యాచ్ ఆద్యంతం ఆసక్తికరంగా సాగింది. ఎట్టకేలకు ఈ మ్యాచ్ లో భారత్ విజయం సాధించింది. దుబాయ్ ఇంటర్నేషనల్ స్టేడియం వేదికగా జరిగిన పోరులో హార్దిక్ పాండ్యా ఆల్ రౌండ్ షో తో భారత్ కు విజయాన్ని అందించి.. అభిమానులను ఖుషీ చేశాడు. ఈ విజయంతో భారత్ ఆసియా కప్ లో శుభారంభం చేసింది. భారత్ 5 వికెట్ల తేడాతో పాకిస్థాన్ పై విజయం సాధించింది. పాక్ నిర్దేశించిన 148 పరుగుల విజయలక్ష్యాన్ని భారత్ 19.4 ఓవర్లలో ఛేదించింది. హార్దిక్ పాండ్యా 17 బంతుల్లో 4 ఫోర్లు, 1 సిక్స్ తో 33 పరుగులు చేసి అజేయంగా నిలిచాడు. జడేజా 29 బంతుల్లో 2 ఫోర్లు, 2 సిక్స్ లతో 35 పరుగులు చేశాడు. విరాట్ కోహ్లీ 35 పరుగులు చేయగా, సూర్యకుమార్ యాదవ్ 18 పరుగులు చేశాడు. రవీంద్ర జడేజా, హార్దిక్ పాండ్యా జోడీ రాణించడంతో భారత్ విజయాన్ని అందుకుంది. ఆఖరి ఓవర్లో భారత్ విజయానికి 7 పరుగులు అవసరం కాగా, నవాజ్ బౌలింగ్ లో తొలి బంతికే జడేజా అవుటయ్యాడు. హార్దిక్ పాండ్యా సిక్స్ తో మ్యాచ్ ను ముగించాడు. పాక్ బౌలర్లలో నసీమ్ షా 2, మహ్మద్ నవాజ్ 3 వికెట్లు తీశారు.