ఐటీఆర్‌ దాఖలుకు గడువు పొడిగింపు.. వీరికి మాత్రమే..

ఆదాయపు పన్ను రిటర్న్‌లు దాఖలు చేయడానికి కంపెనీలకు మాత్రమే చివరి తేదీని నవంబర్ 30 వరకు పొడిగించినట్లు కేంద్ర ప్రభుత్వం తెలిపింది. ఇది కాకుండా, తమ ఖాతాలను ఆడిట్ చేయాల్సిన కంపెనీలకు, ఆడిట్ నివేదికను సమర్పించడానికి గడువు తేదీని అక్టోబర్ 31 వరకు పొడిగించారు. 2023-24 అసెస్‌మెంట్ సంవత్సరానికి ఫారమ్ ఐటీఆర్-7లో ఆదాయ రిటర్న్‌ను సమర్పించడానికి గడువు తేదీని అక్టోబర్‌ 31 నుంచి నవంబర్‌ 30 వరకు పొడిగించినట్లు ఆర్థిక మంత్రిత్వ శాఖ ఒక ప్రకటనలో తెలిపింది.

2023-24 ఆర్థిక సంవత్సరంలో భారతదేశం తన అన్ని రికార్డులను బద్దలు కొట్టింది. 2023-24 అసెస్‌మెంట్ సంవత్సరానికి జూలై 31 వరకు రికార్డు స్థాయిలో 6.77 కోట్ల ఆదాయపు పన్ను రిటర్న్‌లు దాఖలయ్యాయని, ఇందులో 53.67 లక్షలు మొదటిసారి ఐటీఆర్‌లు అయ్యాయని కేంద్ర మంత్రిత్వ శాఖ వెల్లడించింది.

జూలై 31, 2023న ఐటిఆర్ ఫైలింగ్ గరిష్ట స్థాయికి చేరుకుంది. ఒకే రోజులో 64.33 లక్షలకు పైగా ఐటిఆర్‌లు దాఖలు అయ్యాయి. జూలై 31, 2023 వరకు మొదటిసారిగా ఫైల్ చేసిన వారి నుండి డిపార్ట్‌మెంట్ 53.67 లక్షల ఐటీఆర్‌లను పొందిందని డిపార్ట్‌మెంట్ తెలిపింది. 6.77 కోట్ల ఐటీఆర్‌లలో 5.63 కోట్ల రిటర్న్‌లు ఇ-వెరిఫై చేయబడ్డాయి. ఈ-ఫైలింగ్ పోర్టల్‌లో అందుబాటులో ఉన్న ఆన్‌లైన్ ఐటీఆర్ యుటిలిటీని ఉపయోగించి 46 శాతానికి పైగా ఐటీఆర్‌లు దాఖలు అయినట్లు తెలిపింది.