రూ.2000 నోట్ల మార్పిడిపై ఆర్బీఐ గుడ్‌న్యూస్‌.. ఇలా కూడా మార్చుకోవచ్చు

రూ.2000 నోట్లను మార్పిడి, డిపాజిట్ చేసుకునేందుకు గడువు ముగిసిన విషయం తెలిసిందే. అయితే ఆర్బీఐ మరో అవకాశం ఇచ్చింది. ఆర్బీఐకి సంబంధించిన కార్యాలయాలలో మార్చుకునేందుకు వెసులుబాటు ఇచ్చింది. ఇప్పుడు మరో నిర్ణయం తీసుకుంది ఆర్బీఐ. ఇప్పటి వరకు రూ. 2000 నోట్లను డిపాజిట్ చేయని వారు ఉంటే ఈ వార్త మీ కోసమే. ప్రజలు ఇప్పుడు తమ రూ.2000 నోట్లను రిజిస్టర్డ్ పోస్ట్ ద్వారా రిజర్వ్ బ్యాంక్ ప్రాంతీయ కార్యాలయానికి పంపి తమ బ్యాంకు ఖాతాల్లో జమ చేసుకోవచ్చు. రిజర్వ్ బ్యాంక్ ప్రాంతీయ కార్యాలయాలకు దూరంగా నివసించే వారికి ఇది సులభమైన ఆప్షన్‌ అనే చెప్పాలి.

రిజర్వ్ బ్యాంక్ ఆఫ్ ఇండియా (RBI) రీజినల్ డైరెక్టర్ రోహిత్ మాట్లాడుతూ .."రూ. 2,000 నోట్లను పోస్ట్ ద్వారా వారి ఖాతాల్లోకి అత్యంత సౌకర్యవంతంగా, సురక్షితమైన పద్ధతిలో నేరుగా క్రెడిట్ చేయడానికి ఆర్బీఐకి పంపమని మేము ప్రోత్సహిస్తున్నాము. ఇది వారి ఇబ్బందులను దూరం చేస్తుంది. గడువు ముగిసిన తర్వాత ప్రత్యేక ఆర్బీఐ కార్యాలయాలలో డిపాజిట్‌ చేసుకునేందుకు అవకాశం ఇచ్చామని, అలాంటి సమయంలో క్యూలో నిలబడటం ఇబ్బందిగా మారవచ్చు. ఇలాంటి వారు పోస్టు ద్వారా ఆర్బీఐ కార్యాలయానికి పంపించి వారి అకౌంట్లో డిపాజిట్‌ చేసుకోవచ్చని సూచించింది. టీఎల్‌ఆర్‌ చేయబడిన పోస్ట్ ఎంపికలు రెండూ అత్యంత సురక్షితమైనవని, ఈ ఎంపికల పట్ల ప్రజల మనస్సులలో ఎటువంటి భయమూ ఉండకూడదని ఆయన అన్నారు.

మే 19న ఆర్‌బీఐ రూ. 2000 నోట్లను చలామణి నుంచి ఉపసంహరించుకుంటున్నట్లు ఆర్బీఐ ప్రకటించిన విషయం తెలిసిందే. ఈ నోట్లను బ్యాంకుల్లో డిపాజిట్ చేసి ఇతర విలువల నోట్లతో మార్చుకునే వెసులుబాటును ప్రజలకు కల్పించారు. ఈ విధంగా, మే 19, 2023 వరకు, చెలామణిలో ఉన్న రూ. 2,000 విలువైన మొత్తం నోట్లలో 97 శాతానికి పైగా ఇప్పుడు తిరిగి వచ్చాయి.

ఈ నోట్లను మార్చుకోవడానికి లేదా బ్యాంకు ఖాతాల్లో జమ చేయడానికి ముందుగా సెప్టెంబర్ 30 వరకు గడువు విధించారు. తర్వాత ఈ గడువును అక్టోబర్ 7 వరకు పొడిగించారు. దీని తరువాత, బ్యాంకు శాఖలలో 2000 రూపాయల నోట్ల డిపాజిట్, మార్పిడి సౌకర్యాలు రెండూ అక్టోబర్ 7తో గడువు ముగిసింది. RBI తన 19 ప్రాంతీయ కార్యాలయాలను వ్యక్తిగతంగా లేదా పోస్ట్ ద్వారా సందర్శించడం ద్వారా ఇప్పటికీ 2000 రూపాయల నోట్లను డిపాజిట్ చేసుకోవచ్చని ప్రెస్ నోట్ ద్వారా తెలియజేసింది. ఇందుకు సంబంధించిన ఫార్మాట్‌ను కూడా ఆర్‌బీఐ విడుదల చేసింది.

పోస్టు ద్వారా రూ. 2000 నోట్లను ఎలా పంపాలి?

ఇక్కడ ఇచ్చిన ఫారమ్ ఆధారంగా మీరు RBI బ్రాంచ్‌లో 2000 రూపాయల నోట్లను డిపాజిట్ చేసే సౌకర్యం కల్పించబడింది. ఇక్కడ పేర్కొన్న దరఖాస్తు ఫారమ్‌లో అవసరమైన అన్ని వివరాలను సరిగ్గా పూరించడం ద్వారా మీరు భారత పోస్ట్‌లోని ఏదైనా పోస్ట్ ఆఫీస్ నుండి పంపవచ్చు.