Gold Price Today : ఎంత చల్లటి కబురు.. బంగారం ఇక అందుబాటులోకి వచ్చినట్లేనా?

బంగారంపై పెట్టుబడి పెడితే దానిని సురక్షితమైనదిగా భావిస్తారు. సులువుగా తమకు అవసరమైన సమయంలో నగదుగా మార్చుకునే వీలు ఒక్క బంగారం విషయంలోనే సాధ్యమవుతుంది. తరుగు వంటివి తీసేసి మన డబ్బులు మనకు తిరిగి వస్తాయి. మన అవసరాల కోసం బంగారం ఆదుకుంటుందన్న భావన ప్రజల్లో బలంగా పడిపోయింది. అందుకే వీలున్నప్పుడల్లా, అవసరం లేకపోయినా బంగారం, వెండి కొనుగోలు చేయడానికి ఎక్కువ మంది ప్రయత్నిస్తుంటారు. ఇక శుభకార్యాలు ఇంట్లో ఉంటే చాలు బంగారాన్ని కొనుగోలు చేయకుండా అస్సలు ఉండరు. విదేశాల్లో మాదిరిగా గోల్డ్ బాండ్స్ వైపు ఇక్కడ చూడటం అరుదు. కేవలం ఆభరణాలను మాత్రమే కొనుగోలు చేస్తుంటారు.

అందుకే దక్షిణ భారత దేశంలో వీధికొక కార్పొరేట్ జ్యుయలరీ దుకాణం వెలిసింది. అనేక ఆఫర్లతో ప్రతి రోజూ పసిడి ప్రియులను ఆకట్టుకునేందుకు వ్యాపారులు ప్రయత్నిస్తూనే ఉంటారు. తరుగులో తగ్గింపుతో పాటు బంగారం కొనుగోలు చేస్తే వెండి ఫ్రీ అనే ఆఫర్ కూడా ఆకట్టుకునేలా ఉంది. ఇలా అనేక రకాలుగా వినియోగదారులను రప్పించడానికి చేస్తున్న ప్రయత్నాలు కొంత వరకూ ఫలిస్తున్నాయని చెప్పాలి. ఈరోజు దేశంలో బంగారం ధరలు భారీగా తగ్గాయి. వెండి ధరలు కూడా అదే స్థాయిలో తగ్గాయి. గత మూడు రోజుల నుంచి పది గ్రాముల బంగారం ధరపై దాదాపు 2,500 రూపాయలు తగ్గింది. అలాగే కిలో వెండి ధరపై 2,600 రూపాయలు తగ్గాయి. హైదరాబాద్ బులియన్ మార్కెట్ లో ఈరోజు బంగారం, వెండి ధరలు ఇలా ఉన్నాయి. 22 క్యారెట్ల పది గ్రాముల బంగారం ధర 70,790 రూపాయలుగా ఉంది. 24 క్యారెట్ల పది గ్రాముల బంగారం ధర 77,230 రూపాయలుగా ట్రెండ్ అవుతుంది. కిలో వెండి ధర 97,900 రూపాయలుగా నమోదయింది.