దారుణం.. బాలుడిని చంపి కూలర్లో కుక్కేశారు

మాచంద్ పోలీస్ స్టేషన్ ఇన్ఛార్జి వివేక్ ప్రభాత్ తెలిపిన వివరాల ప్రకారం.. బుధవారం మధ్యాహ్నం 3.30 గంటలకు ఐదేళ్ల బాలుడు ట్యూషన్ కు వెళ్లాడు. కానీ అతను ట్యూషన్ కు చేరుకోలేదు. ఇటు ఇంటికీ రాలేదు. బాలుడు తప్పిపోయాడనుకున్నతల్లిదండ్రులు వెతకడం ప్రారంభించారు. ఆచూకీ తెలియకపోవడంతో పోలీస్ స్టేషన్లో ఫిర్యాదు చేశారు. పోలీసులు ఆ చిన్నారితో పాటే ట్యూషన్ కి వెళ్లే చిన్నారులను ఆరా తీయగా.. పక్కనే ఉన్న సంతోష్ చౌరాసియా ఇంట్లోకి వెళ్లినట్లు తెలిసింది. అక్కడ సోదాలు చేయగా.. కనిపించిన దృశ్యం చూసి పోలీసులు షాకయ్యారు. బాలుడిని చంపి మృతదేహాన్ని కూలర్ లో కుక్కారు. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు. బాలుడి కుటుంబ సభ్యులు ఈ దారుణానికి పాల్పడ్డారా ? సంతోష్ కుటుంబీకులు ఇలా చేశారా ? మరేదైనా కారణం ఉందా ? అనే కోణాల్లో విచారణ చేస్తున్నారు.