చంద్రబాబు నియోజకవర్గం కుప్పంలో భారీ పేలుడు

చిత్తూరు జిల్లా కుప్పంలో భారీ పేలుడు సంభవించింది. కుప్పం పట్టణంలోని కొత్తపేట పెద్దపల్లి గంగమాంబ దేవస్థానం వీధిలోని ఓ ఇంట్లో భారీ పేలుడు జరిగింది. నాటు బాంబు, జిలెటిన్ స్టిక్స్ పేలినట్టు తెలుస్తోంది. పేలుడు ధాటికి ఆ ఇంట్లోని మురుగేష్, ధనలక్ష్మీ దంపతులకు గాయాలు అయ్యాయి. గుర్తు తెలియని దుండగులు ఆ దంపతుల ఇంటి గుమ్మం వద్ద పేల్చినట్లు చెబుతున్నారు. నాటు బాంబు, జిలెటిన్‌స్టిక్స్‌ పెట్టి పేల్చినట్లు అనుమానాలు వ్యక్తం అవుతున్నాయి. ఈ పేలుడుదాటికి ఇల్లు ధ్వంసం కాగా.. దంపతుల పరిస్థితి అత్యంత విషమంగా మారింది. వారిని కుప్పం పీఈఎస్ ఆసుపత్రికి తరలించారు. స్థానికుల సమాచారంతో ఘటనా స్థలానికి చేరుకున్న పోలీసులు కేసు నమోదు చేసి విచారణ మొదలుపెట్టారు.