స్కూల్ బస్సు వెళ్లి వ్యవసాయ భూముల్లో పడింది.. డ్రైవర్ పరారీ

తొర్రూరులోని నలంద ప్రైవేట్‌ పాఠశాలకు చెందిన బస్సు బుధవారం దంతాలపల్లి మండలం పెద్ద ముప్పారం నుంచి విద్యార్థులతో బయల్దేరింది. పెద్దముప్పారం, కుమ్మరికుంట్ల, దంతాపల్లికి చెందిన సుమారు 42 మంది విద్యార్థులతో బొడ్లాడ గ్రామానికి వెళ్తోంది. ఈ క్రమంలో బొడ్లాడ శివారులో బస్సు ఒక్కసారిగా అదుపుతప్పి పక్కనే ఉన్న వ్యవసాయ భూముల్లోకి వెళ్లి బోల్తా పడింది. వెంటనే బస్సులోకి విద్యార్థులను సమీపంలోని స్థానికులు బయటకు తీసుకొచ్చారు. గాయపడిన వారిని పోలీసు వాహనంలో ఆస్పత్రికి తరలించారు. డ్రైవర్‌ అతివేగంతో బస్సును నడుపుతున్నాడని గతంలో ఫిర్యాదు చేసినా యాజమాన్యం పట్టించుకోవడం లేదని తల్లిదండ్రులు ఆరోపిస్తున్నారు.