బంజారాహిల్స్‌లో బీభత్సం.. జీహెచ్‌ఎంసీ ఉద్యోగిని ఈడ్చుకెళ్లిన కారు
బంజారాహిల్స్ పరిధిలో శుక్రవారం తెల్లవారుజామున వేగంగా వస్తున్న బీఎండబ్ల్యూ కారు ఢీకొనడంతో జీహెచ్‌ఎంసీ ఉద్యోగి తీవ్రంగా గాయపడ్డాడు.
హైదరాబాద్: నగరంలోని బంజారాహిల్స్ పరిధిలో శుక్రవారం తెల్లవారుజామున వేగంగా వస్తున్న బీఎండబ్ల్యూ కారు ఢీకొనడంతో జీహెచ్‌ఎంసీ ఉద్యోగి తీవ్రంగా గాయపడ్డాడు. కారు నడుపుతున్న వ్యక్తి మద్యం మత్తులో ఉన్నట్లు పోలీసులు అనుమానిస్తున్నారు. ఈ ఘటనకు సంబంధించిన సీసీటీవీ ఫుటేజీలో ద్విచక్ర వాహనంపై వెళ్తున్న వ్యక్తిని ఎదురుగా వేగంగా వస్తున్న ఎస్‌యూవీ ఢీకొట్టింది. స్కూటర్‌పై ఉన్న వ్యక్తి వేగాన్ని తగ్గించాడు. అయితే కారు అతని వాహనంపైకి దూసుకెళ్లింది.
అతనిని కొంత దూరం వరకు ఈడ్చుకెళ్లింది. ఘటన అనంతరం కారు నడుపుతున్న వ్యక్తి పరారయ్యాడు. గాయపడిన జి. బాల చందర్ యాదవ్‌ను బాటసారులు ఆసుపత్రికి తరలించారు. గ్రేటర్‌ హైదరాబాద్ మున్సిపల్‌ కార్పొరేషన్‌ (జీహెచ్‌ఎంసీ) సర్కిల్‌ మేనేజర్‌ బాల యాదవ్‌ డ్యూటీకి వెళ్తుండగా ఈ ఘటన జరిగింది. బంజారాహిల్స్ పోలీసులు కేసు నమోదు చేసి ఎస్‌యూవీ నడిపిన వ్యక్తి కోసం గాలిస్తున్నారు.
మూడు రోజుల క్రితం నగర శివార్లలోని బండ్లగూడ జాగీర్‌లో మార్నింగ్ వాక్ చేస్తున్న వారిపై అతివేగంగా వచ్చిన కారు ఢీకొన్న ఘటన చోటుచేసుకుంది. ఈ ప్రమాదంలో ఇద్దరు మహిళలు మృతి చెందగా, మరో ఇద్దరు గాయపడ్డారు. కారు నడుపుతున్న 19 ఏళ్ల విద్యార్థిని పోలీసులు అదుపులోకి తీసుకున్నారు. తన ఇద్దరు స్నేహితులతో కలిసి పుట్టినరోజు జరుపుకునేందుకు మొయినాబాద్ వెళ్తున్నాడు. ఈ ఘోర ప్రమాద దృశ్యాలు సీసీటీవీ కెమెరాలో రికార్డయ్యాయి. వేగంగా వెళ్తున్న కారు టర్నింగ్‌ దగ్గర అదుపు తప్పి రోడ్డుపై నడుచుకుంటూ వెళ్తున్న ముగ్గురు మహిళలను ఢీకొట్టింది. మరో వ్యక్తి కూడా గాయపడ్డాడు. కారు నడుపుతున్న వ్యక్తి, ఇతర ప్రయాణికులు వాహనాన్ని వదిలి పరారయ్యారు. అనంతరం డ్రైవర్‌ను అదుపులోకి తీసుకున్నారు.
