జగన్ గుడ్ లుక్స్ లో… ఫ్యూచర్ లోనూ మంచికేనట

యువ నాయ‌కుడు, జ‌గ‌న్ కేబినెట్ లో వ్యవ‌సాయ మంత్రిగా ఉన్న కుర‌సాల క‌న్నబాబుకు మంచి మార్కులు ప‌డుతున్నాయా ? సీఎం జ‌గ‌న్ దృష్టిలో ఆయ‌న మంచి నాయ‌కుడుగా అనిపించుకుంటున్నారా ? అంటే.. సీఎంవో వ‌ర్గాలు ఔన‌నే అంటున్నాయి. క‌రోనా ఎఫెక్ట్‌తో నాయ‌కులు, మంత్రులు పెద్దగా ఇళ్ల నుంచి బ‌య‌టకు రావ‌డం లేదు. ప‌ట్టుమ‌ని ఓ ప‌ది మంది మాత్రమే.. వ్యవ‌హారాలు చ‌క్కబెడుతున్నారు. వీరిలో క‌న్నబాబు ఏకంగా విజ‌య‌వాడ‌లోనే ఉంటూ.. క‌రోనాకు సంబంధించిన వ్యవ‌హారాల‌ను నిరంత‌రం స‌మీక్షిస్తున్నారు. అదే స‌మ‌యంలో ప్రతిప‌క్షాల నుంచి వ‌చ్చే విమ‌ర్శల‌కు ఎప్పటిక‌ప్పుడు గ‌ట్టి కౌంట‌ర్ ఇస్తున్నారు.

విజయవాడలోనే ఉంటూ….

అదే స‌మ‌యంలో కొన్ని ప‌త్రిక‌లు రాస్తున్న వ్యతిరేక క‌థ‌నాల‌పై కూడా క‌న్నబాబు త‌న‌దైన శైలిలో విమ‌ర్శలు గుప్పిస్తున్నారు. నిజాలు తెలుసుకోకుండా ప‌త్రిక‌లు రాస్తున్నాయ‌ని, ప్రభుత్వం చేస్తున్న కార్యక్రమాల‌ను ఏదో ఒక రూపంలో విమ‌ర్శించాల‌నే ల‌క్ష్యంగా ముందుకు సాగుతున్నాయ‌ని వాటి ప్రయోజ‌నాలు ఏంటో అర్ధం కావ‌డం లేద‌ని ఓ ప్రధాన ప‌త్రిక‌ను ఉద్దేశించి నిప్పులు చెరిగారు. నిజానికి మంత్రులు మీడియాను ఉద్దేశించి విమ‌ర్శలు చేయ‌డం కొత్త కాక‌పోయినా.. క‌రోనా స‌మ‌యంలో ఎంతో బిజీగా ఉన్నప్పటికీ.. నిశితంగా ప‌రిశీలించి, మీడియాపై విమ‌ర్శలు చేయ‌డాన్ని వైసీపీ నేత‌లు ఆహ్వానిస్తున్నారు.

తన సొంత నియోజకవర్గంపైనా?

ప్రభుత్వం త‌ర‌ఫున క‌న్నబాబు అధికారికంగా మాట్లాడుతుండ‌డం, విప‌క్షాల‌కు గ‌ట్టి కౌంట‌ర్ ఇస్తుండ‌డం ప్రస్తుతం ఆయ‌న‌కు సీఎం జ‌గ‌న్ ద‌గ్గర మంచి మార్కులు ప‌డేలా చేసింద‌ని అంటున్నాయి ముఖ్యమంత్రి కార్యాల‌య వ‌ర్గాలు. మిగిలిన మంత్రులు త‌మ ప‌నులు తాము చేసుకుని పోతున్నారు. కానీ, క‌న్నబాబు అటు ఆరోగ్య ప‌రిస్థితి గురించి, క‌రోనా కేసులు పెరుగుతుండ‌డంపైనా, త‌న సొంత జిల్లా తూర్పుగోదావరిలో జ‌రుగుతున్న ప‌రిణామాల‌పైనా కూడా స్పందిస్తున్నారు. రాష్ట్ర వ్యాప్తంగా ఆయ‌న సుడిగాలి ప‌ర్యట‌న‌లు కూడా చేస్తున్నారు. జ‌గ‌న్‌కు అన్ని విష‌యాల్లోనూ ఆయ‌న పూర్తి స‌హ‌కారం అందిస్తున్నారు.

గట్టి వాయిస్ తో…..

ఇక వైసీపీలో 25 మంది మంత్రులు ఉన్నా గ‌ట్టిగా మాట్లాడేది న‌లుగురైదుగురు మంత్రులు మాత్రమే ఉన్నారు. వీరిలో కొంద‌రు స‌బ్జెక్ట్ లేకుండా మాట్లాడుతుంటే.. మ‌రి కొంద‌రు కాంట్రవ‌ర్సీగా మాట్లాడుతూ ప్రభుత్వానికి సామాన్య జ‌నాల్లో చెడ్డపేరు తెచ్చేలా వ్యవ‌హ‌రిస్తున్నారు. అయితే క‌న్నబాబు మాత్రం ప్రతి విష‌యంపైనా స‌బ్జెక్టుతో ప్రతిప‌క్షాల‌ను కౌంట‌ర్ చేస్తున్నారు. మీడియా మీటింగుల్లోనూ క్లారిటీగా మాట్లాడుతున్నారు. దీంతో వైసీపీ కి గ‌ట్టి వాయిస్‌గా ఉన్న క‌న్నబాబుకు జ‌గ‌న్ మంచి మార్కులే ఇచ్చార‌ని అంటున్నారు సీఎంవో అధికారులు.