ఫ్యాక్ట్ చెక్: వైరల్ అవుతున్న వీడియోలో ఉన్నది అంబేద్కర్ అసలైన వాయిస్ కాదు

డిసెంబరు 22, 23 తేదీల్లో దేశవ్యాప్తంగా వివిధ నగరాల్లో పార్టీ ఎంపీలు, సీనియర్ నేతలు విలేకరుల సమావేశాలు నిర్వహిస్తారని, డిసెంబర్ 24న ప్రతి జిల్లాలో కాంగ్రెస్ పార్టీ అంబేద్కర్ గౌరవ యాత్రలు నిర్వహిస్తుందని కాంగ్రెస్ ప్రధాన కార్యదర్శి కెసి వేణుగోపాల్ తెలిపారు. రాజ్యసభలో ప్రసంగం సందర్భంగా అమిత్ షా అంబేద్కర్‌ను అగౌరవపరిచారని కాంగ్రెస్ పార్టీతో పాటు ఇతర ప్రతిపక్ష పార్టీలు ఆరోపించాయి.

రాజ్యసభలో మాట్లాడిన అమిత్ షా.. ఈ మధ్య అంబేద్కర్..అంబేద్కర్..అంబేద్కర్ అని అనడం ఫ్యాషన్ అయింది. ప్రతిపక్షాలు తరచూ దేవుడి పేరు స్మరించి ఉంటే స్వర్గానికి చేరుకునేవారని కేంద్ర హోంమంత్రి షా అన్నారు. ఈ వివాదం అనంతరం.. తన వ్యాఖ్యలను వక్రీకరించారని అమిత్ షా స్పందించారు. ‘‘నేనెప్పుడూ అంబేద్కర్ కు వ్యతిరేకంగా మాట్లాడలేదు. నా వ్యాఖ్యలను కాంగ్రెస్ వక్రీకరించింది. ఆ పార్టీ అవాస్తవాలను ప్రచారం చేస్తున్నది. నా స్పీచ్ ను ఎడిట్ చేసి ప్రజలకు షేర్ చేస్తున్నది. నా స్పీచ్ మొత్తం వినాలని ప్రజలకు విజ్ఞప్తి చేస్తున్నాను. అప్పుడు నిజమేంటో అర్థమవుతుంది” అని అమిత్ షా వివరణ ఇచ్చారు.

అంబేద్కర్ కు చెందిన ఆడియో అంటూ కొన్ని పోస్టులు సోషల్ మీడియాలో వైరల్ అవుతూ ఉన్నాయి. కొందరు వ్యక్తులు కలిసి కూర్చున్న బ్లాక్ అండ్ వైట్ ఫోటో సోషల్ మీడియాలో వైరల్ అవుతోంది. వాయిస్ ఓవర్ లో భారత ప్రజాస్వామ్యం, భారతదేశంలోని అణగారిన తరగతుల గురించి మాట్లాడుతూ ఉన్నారు. 1931లో లండన్‌లో జరిగిన రెండవ రౌండ్ టేబుల్ కాన్ఫరెన్స్ లో బాబాసాహెబ్ అంబేద్కర్ అసలు స్వరం అని ప్రచారం చేస్తున్నారు.

వైరల్ వీడియోకు సంబంధించిన స్క్రీన్ షాట్ ఇక్కడ చూడొచ్చు

ఫ్యాక్ట్ చెకింగ్:

వైరల్ అవుతున్న వాయిస్ అంబేద్కర్ కు చెందినది కాదు. మళయాళ స్టార్ హీరో మమ్ముట్టి నటించిన అంబేద్కర్ సినిమాలోనిది.

మొదట వైరల్ పోస్టుల్లో ఉన్న బ్లాక్ అండ్ వైట్ ఫోటోను ఉపయోగించి Googleలో రివర్స్ ఇమేజ్ సెర్చ్ ను నిర్వహించాము. 1931 సెప్టెంబరు 7 నుండి డిసెంబర్ 1 వరకు లండన్‌లో జరిగిన రెండవ రౌండ్ టేబుల్ కాన్ఫరెన్స్‌లోని ఫోటో అని పలు ఫలితాలు చూపించాయి. ఇందులో ప్రముఖ వ్యక్తులు మహాత్మా గాంధీ, బ్రిటిష్ ప్రధాని రామ్‌సే మెక్‌డొనాల్డ్, డాక్టర్ బి.ఆర్. అంబేద్కర్‌ కలిసి కూర్చున్నారు.

వైరల్ వాయిస్ కు సంబంధించిన ఆడియోను విని, మేము Googleలో సంబంధిత కీవర్డ్ సెర్చ్ ను అమలు చేశాం. ఒరిజినల్ ఆడియో ఉన్న సినిమా మాకు లభించింది.

ఈ ఆడియో 2000 లో రిలీజ్ అయిన డాక్టర్ బాబాసాహెబ్ అంబేద్కర్ బయోపిక్ కు సంబంధించింది. డాక్టర్ అంబేద్కర్ బయోపిక్‌గా రిలీజ్ అయిన సినిమా మలయాళ నటుడు మమ్ముట్టి వాయిస్‌ని కలిగి ఉంది.

1:37:20 టైమ్‌స్టాంప్ వద్ద, డాక్టర్ అంబేద్కర్ పాత్రకు సంబంధించిన ప్రసంగాన్ని మనం వినొచ్చు. అది వైరల్ వీడియోలో ఉన్నదే అని అర్థం చేసుకోవచ్చు.

విదేశాంగ మంత్రిత్వ శాఖ వెబ్‌సైట్‌లో “Dr Babasaheb Ambedkar’s Writings and Speeches Part II” వైరల్ ఆడియోలో వినిపించిన మొత్తం ప్రసంగాన్ని కూడా మేము కనుగొన్నాము. 1930 నవంబర్ 20న జరిగిన రెండవ రౌండ్ టేబుల్ కాన్ఫరెన్స్ ఐదవ సమావేశంలో డాక్టర్ అంబేద్కర్ అట్టడుగు వర్గాలకు రాజకీయ అధికారం అవసరం గురించి మాట్లాడారు. పూర్తి ప్రసంగం 503-535 పేజీలలో చూడవచ్చు.

https://www.mea.gov.in/images/attach/amb/volume_02.pdf


వైరల్ పోస్టుల్లో ఎలాంటి నిజం లేదంటూ పలు మీడియా సంస్థలు ఫ్యాక్ట్ చెక్ చేశాయి. అవి ఇక్కడ, ఇక్కడ చూడొచ్చు.


కాబట్టి, వైరల్ అవుతున్న వాదనలో ఎలాంటి నిజం లేదు. వైరల్ పోస్టులు ప్రజలను తప్పుదోవ పట్టిస్తూ ఉన్నాయి. సినిమాలోని సన్నివేశానికి సంబంధించిన ఆడియోను తీసుకుని ఇదే నిజమైన వాయిస్ అని చెబుతూ ఉన్నారు.