‌Hyderabad : న్యూ ఇయర్ వేడుకలకు ఈ పనిచేశారో.. ఇక అంతే

ప్రధానంగా సాఫ్ట్‌వేర్ సంస్థలు ఎక్కువగా ఉన్న హైదరాబాద్‌లో న్యూ ఇయర్ వేడుకలను నిర్వహించి నాలుగు రూపాయలు సొమ్ము చేసుకునేందుకు ప్రయివేటు సంస్థలు రకరకాల ఆఫర్లు ఇస్తూ యువతను ఊరిస్తున్నాయి. కాంబో ప్యాక్ లను రెడీ చేశాయి. మ్యూజిక్ ఈవెంట్లతో పాటు డిసెంబరు 31వ తేదీ రాత్రంతా వేడుకలను నిర్వహించేందుకు వివిధ రకాలుగా ప్లాన్ చేస్తున్నాయి. ఇందుకోసం వేల రూపాయల వరకూ టిక్కెట్లను నిర్ణయించాయి. ధర ఎంతైనా సంవత్సరం చివరి రోజు ఎంజాయ్ చేసేందుకు యువత క్యూ కడతారన్న నమ్మకంతో ప్రయివేటు సంస్థలు పోటీలు పడి మరీ ఆన్ లైన్ లో టిక్కెట్ల విక్రయాలు జరుపుతున్నాయి.

అయితే వీటిలో పోలీసుల అనుమతి లేకుండా కొన్ని సంస్థలు టిక్కెట్లు ఆన్ లైన్ లో అమ్మకాలు చేస్తున్నట్లు పోలీసు ఉన్నతాధికారుల దృష్టికి వచ్చింది. దీంతో పోలీసు ఉన్నతాధికారులు న్యూ ఇయర్ వేడుకలపై వార్నింగ్ ఇచ్చారు. న్యూ ఇయర్‌ వేడుకలకు అనుమతి తప్పనిసరి అని సైబరాబాద్ పోలీస్ కమిషనర్ అవినాశ్ మహంతి తెలిపారు. నూతన సంవత్సరం సందర్భంగా నిర్వహించే వేడుకలకు తప్పనిసరిగా అనుమతి తీసుకోవాల్సిందేనని తెలిపారు. అనుమతి తీసుకున్న తర్వాతే టికెట్లు విక్రయించాలని స్పష్టం చేశారు. అందుకే టిక్కెట్లు కొనుగోలు చేసే ముందు ఆ ఈవెంట్‌కు పోలీసుల అనుమతి ఉందా? లేదా? అన్నది చూసుకోవాల్సి ఉంటుంది.