Hyderabad : ఇన్నాళ్లకు సరైనోడు దొరికాడు.. చేయిచాస్తే బదిలీ వేటు.. ఖాకీ డ్రస్ నిటారుగా నిలబడిందిగా

హైదరాబాద్ పోలీస్ కమిషనర్ గా రేవంత్ రెడ్డి ప్రభుత్వం అధికారంలోకి రాగానే ఏరి కోరి కొత్తకోట శ్రీనివాసులురెడ్డిని నియమించింది. ఆయన వచ్చీ రాగానే తొలుత తన కమిషనరేట్ పరిధిలోని పోలీస్ స్టేషన్ పరిస్థితులను తెలుసుకున్నారు. తనకున్న ప్రత్యేక వ్యవస్థల ద్వారా ఆయన ఎప్పటికప్పుడు నివేదిక తెప్పించుకుంటున్నారు. స్టేషన్ లో ఏం జరుగుతుంది? ప్రజల పట్ల ఎలా పోలీసులు మసలు కుంటున్నారు? కేసులను సత్వరమే పరిష్కరిస్తున్నారా? సివిల్ కేసుల పంచాయతీని కూడా చేస్తున్నారా? వంటి విషయాలపై ఆయన తాను ప్రత్యేకంగా నియమించిన సిబ్బంది నుంచి సమాచారం తెప్పించుకుని మరీ అవకాశం కోసం వెయిట్ చేస్తున్నారు.

తనకు వచ్చిన సమాచారం కరెక్టేనని తేలితే వెంటనే చర్యలకు దిగుతున్నారు. తాజాగా హైదరాబాద్ పోలీస్ కమిషనరేట్ పరిధిలో 54 మంది ఇన్స్‌పెక్టర్లను బదిలీ చేశారు. సాధారణంగా ఇంత పెద్ద స్థాయిలో బదిలీలు ఒక్కసారి చేయరు. కానీ కొత్తకోట మాత్రం కొరడా ఝులిపించడమే పనిగా పెట్టుకున్నారు. ఇక అవార్డులు అందుకున్న పంజాగుట్ట పోలీసు స్టేషన్ సిబ్బందిపై మామూలుగా చర్యలు తీసుకోలేదు. ఒకరు కాదు.. ఇద్దరు కాదు.. ఏకంగా 85 మందికి బదిలీ ఉత్తర్వులు అందచేశారు. ఇన్స్‌పెక్టర్ నుంచి హోంగార్డు వరకూ ఏ ఒక్కరినీ వదలలేదు. అవినీతికి పాల్పడితే సహించబోనని ఆయన ఈ రూపంలో చేస్తున్న హెచ్చరికలు ఖాకీ డ్రస్‌ను నిటారుగా నిలబడేలా చేస్తాయనడంలో ఏమాత్రం సందేహం లేదు. శభాష్ సర్.. అంటూ ఆయనపై సోషల్ మీడియాలో ప్రశంసలు కురుస్తున్నాయి.