Hydra : హైడ్రా రెడీ అవుతుందా? ముహూర్తం ఫిక్స్ అయినట్లేనా?

మొన్నటి వరకూ కూల్చివేతలతో ఒక రేంజ్ లో మార్మోగిపోయిన హైడ్రా మరోసారి బుల్ డోజర్ స్టార్ట్ చేేసేందుకు సిద్దమయింది. డిసెంబరు రెండో వారంలో ముహూర్తంగా నిర్ణయించినట్లు సమాచారం. డిసెంబరు 9వ తేదీ నుంచి తెలంగాణ అసెంబ్లీ సమావేశాలు జరుగుతున్నాయి.ఈ సమావేశాల్లో హైడ్రా కూల్చివేతల అంశంపై ప్రభుత్వంతో పాటు విపక్షాలు కూడా చర్చించే అవకాశముంది. ప్రభుత్వం కూడా హైడ్రా కూల్చి వేతలపై స్పష్టమైన ప్రకటన చేయడానికి రెడీ అవుతున్నట్లు తెలిసింది.ముఖ్యమంత్రి రేవంత్ రెడ్డి ప్రతిష్టాత్మకంగా తీసుకున్న హైడ్రా సంస్థను విపక్షాలు నీరుగార్చే ప్రయత్నం చేస్తున్నారని భావించి సరైన సమాధానం ఇచ్చేందుకు సిద్ధమయ్యారని చెబుతున్నారు. ఇందుకు సంబంధించి అధికారులకు హైడ్రాకు సంబంధించిన వివరాలను కూడా ముఖ్యమంత్రి కార్యాలయం కోరినట్లు తెలిసింది. తాజాగా హైడ్రా కీలక నిర్ణయం తీసుకుంది. ప్రభుత్వఆస్తుల పరిరక్షణకు ప్రజల నుంచి ఫిర్యాదులు స్వీకరించడానికి సిద్ధమయింది. వచ్చే నెల నుంచి ప్రతి సోమవారం బుద్ధభవన్ లో ప్రజల నుంచి వినతులను హైడ్రా అధికారులు స్వీకరించనున్నారు. చెరువులు, నాలాలు, పార్క్ ల ఆక్రమణలపై ఎవరైనా ఫిర్యాదుచేయవచ్చని హైడ్రా అధికారులు తెలిపారు.