Mangos: ఇదేందయ్యా..సీజన్ ఏంది..ఈ మామిడిపండ్లు ఏంటి?

అయితే ఇప్పుడు మామిడి పండ్లకు కూడా సీజన్ పోయిందనే చెప్పాలి. తాజాగా హైదరాబాద్ లోనూ మామిడిపండ్లు దర్శనమిస్తున్నాయి. హైదరాబాద్ లోని అబ్దుల్లాపూర్ మెట్ లోని బాట సింగారం గడ్డి అన్నారం మార్కెట్ లో మామిడిపండ్లు కనిపించడంతో వ్యాపారులు కూడా వాటిని కొనుగోలు చేసేందుకు ఎగబడ్డారు. రెండు లోడ్ల మామిడిపండ్లు వచ్చినట్లు తెలిసింది. 160 క్వింటాళ్ల మామిడి పండ్లను కొత్త ఏడాది తొలి రోజు రావడంతో వాటిని వ్యాపారులు కొనుగోలు చేశారు.తోతాపూరి, బేనిషన్ రకాలు వచ్చాయని వ్యాపారులు చెబుతున్నారు. ప్రస్తుతం క్వింటాల్ ధర 1700 నుంచి 2,500 రూపాయల వరకూ హోల్ సేల్ వ్యాపారలు విక్రయిస్తున్నారట. అయినా సరే చిరు వ్యాపారులు వాటిని కొనుగోలు చేసేందుకు పోటీ పడటంతో వచ్చిన రోజే స్టాక్ ఖాళీ అయిందని చెబుతున్నారు.

హైదరాబాద్ లో మామిడిపండ్లకు మంచి గిరాకీ ఉంటుంది. ధర ఎంతైనా కొనుగోలు చేసేవారుండటంతో సేల్స్ ఎక్కువగా ఉంటాయని చిరు వ్యాపారులు వాటిని కొనుగోలు చేసి వెళ్లిపోయారు. అయితే ఈ మామిడిపండ్లు తమిళనాడు, ఆంధ్రప్రదేశ్ లోని అనంతపుం జిల్లాల నుంచి ఈ మామిడిపండ్లు వచ్చాయని హోల్ సేల్ వ్యాపారులు చెబుతున్నారు. మొన్నామధ్య విజయవాడలోనూ మామిడిపండ్లు, తాటిముంజల విక్రయం అందరినీ ఆశ్చర్యంలో ముంచెత్తింది. ప్రకాశం జిల్లా ఉలవపాడుకు చెందిన మామిడి పండ్లు మంచి రుచికరంగా ఉండటంతో విజయవాడ మార్కెట్ కు వచ్చిన వెంటనే అవి వెంటనే అమ్ముడుపోయాయి. అలాగే ఇప్పుడు హైదరాబాద్ లోనూ మామిడిపండ్ల రాకతో నగరవాసులు ఆనందం వ్యక్తం చేస్తున్నారు.