పప్పులో పాము

ఈసీఐఎల్ సెంట్రల్ క్యాంటీన్‌లో వండిన ఆహారాన్ని చర్లపల్లిలోని ఈవీఎం సంస్థకి పంపించారు. శుక్రవారం మధ్యాహ్నం ఉద్యోగులకు ఆహారం అందించారు. అప్పటికే కొందరు భోజనాలు చేయగా.. ఇంకొందరు తింటూ ఉన్నారు. ఆ సమయంలో పప్పులో నుండి పాము పిల్ల బయటపడింది. అది చూసిన ఉద్యోగులు ఆందోళన వ్యక్తం చేశారు. సిబ్బంది నిర్లక్ష్యంపై మండిపడ్డారు. ఈ విషయం బయటకు రాకుండా ఉండేందుకు ప్రయత్నించినప్పటికీ.. అప్పటికే కొందరు పాము ఫోటోలు తీయడం.. వాట్సాప్ గ్రూప్ లలో షేర్ చేయడం జరిగిపోయింది. అప్పటికే తినేసి కొందరు ఉద్యోగులు మీడియాకు, పోలీసులకు సమాచారం అందించారు. ఈ క్యాంటీన్‌లో గతంలో కూడా ఇలాంటి ఘటనలు చోటు చేసుకున్నాయని పలువురు ఆగ్రహం వ్యక్తం చేశారు. గతంలో కూడా ఆహార పదార్థాల్లో ఎలుకలు, బీడీలు, సిగరెట్టు, జిల్ల పురుగులు వచ్చినట్టు ఉద్యోగులు తెలిపారు. ఏమాత్రం నాణ్యత లేని ఆహారాన్ని అందిస్తున్నారని.. నిర్లక్ష్యం వహించిన వారిని వెంటనే సస్పెండ్ చేయాల్సిందిగా ఉద్యోగులు డిమాండ్ చేశారు.