చిగురుటాకులా వణికిపోతున్న అగ్రరాజ్యం.. 60కి పెరిగిన మృతులు

పూర్తిగా మంచులో కూరుకుపోయిన బఫెలోలో సిబ్బంది మంచును తొలగించేందుకు సహాయక చర్యలు చేపట్టారు. అక్కడ మంచులో కూరుకుపోయిన వాహనాల్లో మృతదేహాలను గుర్తించినట్లు అధికారులు పేర్కొన్నారు. ఇంకా ఎవరైనా వాహనాల్లో ఉండిపోయారా అని ప్రతి వాహనాన్ని తనిఖీ చేస్తున్నారు. ఇక వాహనాల పరిస్థితి ప్రత్యేకంగా చెప్పనక్కర్లేదు. రోడ్లన్నీ కార్లు, బస్సులు, అంబులెన్సులు, ట్రక్కులతో నిండిపోయి.. మంచులో కూరుకుపోయాయి. ఒంటరిగా ఉన్నవారికి అత్యవరస వైద్యం చేయడం కష్టతరమవుతోందని వైద్యులు చెబుతున్నారు. అస్వస్థతకు గురైన వారిని ఆస్పత్రులకు తరలించేందుకు హై లిఫ్ట్ ట్రాక్టర్లను మోహరించారు. మంగళవారం వరకు పశ్చిమ న్యూయార్క్లో 23 సెంటీమీటర్లకు పైగా మంచు కురిసే అవకాశం ఉందని అధికారులు తెలిపారు. మంచు తుపాను కారణంగా అమెరికాలో 15 వేలకు పైగా విమాన సర్వీసులు రద్దవ్వడంతో.. ప్రయాణికులు ఎయిర్ పోర్టులలో పడిగాపులు పడుతున్నారు.